ОХУ-ын эрх баригчид Швейцарын "Audemars Piguet" брэндийн олон сая ам.долларын үнэ бүхий тансаг зэрэглэлийн бугуйн цагнуудыг хураан авчээ.

Тус улсын аюулгүй байдлын албаны ажилтнууд "Audemars Piguet"-г гаалийн дүрэм зөрчсөн гэх үндэслэлээр Москва дахь албан ёсны дэлгүүр дэх бүх барааг нь хурааж авсан тухай Швейцарын хэвлэлүүд мэдээлсэн байна.

Үүнээс хэдхэн хоногийн өмнө Швейцар улс уламжлалт төвийг сахих байдлаа орхиж, Барууны орнуудтай нэгдэн, Оросын эсрэг хориг арга хэмжээ авсан юм.

Одоо тус брэнд нь ОХУ дахь үйл ажиллагаагаа зогсоосон бөгөөд Москва дахь хоёр салбар нь "түр хугацаагаар" хаагдсан байна. Салбарын албаны хүмүүсийн мэдээлснээр, өнгөрсөн жил Швейцар улс Орос руу 280 сая ам.долларын бугуйн цаг экспортолсон хэдий ч тансаг зэрэглэлийн бүтээгдэхүүн худалдан авдаг орос үйлчлүүлэгчдийн тоог харгалзан үзвэл Швейцарын хувьд Оросын зах зээл үүнээс ч илүү үнэтэй байж магадгүй.

ОХУ дахь үйл ажиллагаагаа зогсоож, бизнесийн харилцаагаа тасалж буй Барууны компаниудын хөрөнгийг үндэсний өмч болгох шинэ хуулийг Ерөнхийлөгч асан Дмитрий Медведев энэ сарын эхээр танилцуулсан бөгөөд орон нутгийн эрх баригчид сүүлийн хэдэн долоо хоногт энэхүү ажлыг эрчимжүүлж байгаа билээ. Одоогийн байдлаар тус улсад бараг 10 тэрбум ам.долларын үнэтэй гадаадын түрээсийн нисэх онгоцнууд байгаа ба эзэд нь онгоцоо буцааж өгөх хүсэлтэд татгалзсан хариу өгсөн байна.

Эх сурвалж: BBC

---