Оросын тэрбумтан Роман Абрамович энэ сарын эхээр Украин-Беларусийн хил дээр болсон энхийн хэлэлцээрийн үеэр химийн хорт бодист хордсон гэж түүний ойрын эх сурвалжууд мэдээлжээ.

Түүнчлэн энхийн хэлэлцээрт оролцсон Украины хоёр төлөөлөгчид мөн адил шинж тэмдэг илэрсэн байна. "Bellingcat" эрэн сурвалжлах сэтгүүлзүйн бүлгийн мэдээлснээр, ноён Абрамович болон украйн төлөөлөгчдөд "химийн зэвсгээр хордсон шинж тэмдгүүд" илэрсэн бөгөөд тэдний нүд маш ихээр өвдөж, арьс нь үрэвсэн, хууларч байсан аж.

Шинжээчдийн үзэж буйгаар, энхийн яриа хэлэлцээрийг сэвтээхийг хүссэн Оросын хэт туйлшрагч нар энэхүү хорт бодисын халдлагыг зохион байгуулсан байж магадгүй юм.

Энэ сарын 3-нд болсон уг явдлаас хойш Абрамович болон Украины төлөөлөгчдийн биеийн байдал сайжирсан гэж "The Wall Street Journal" сонин мэдээлсэн байна. Тэрбумтны ойрын эх сурвалжийн хэлснээр, тэрээр одоо бүрэн эдгэрсэн бөгөөд Украин дахь түрэмгийллийг зогсоож, энхийн хэлэлцээрт туслах оролдлогоо үргэлжлүүлж байгаа гэнэ.

Роман Абрамовичийг ОХУ-ын Ерөнхийлөгч Владимир Путинтэй холбоотой гэх үндэслэлээр ЕХ болон Их Британи түүний эсрэг хориг арга хэмжээ авсан ч тэрээр үүнийг үгүйсгэсэн билээ. Тэгвэл Украины Ерөнхийлөгч Владимир Зеленский ноён Абрамовичийн эсрэг хориг тавихгүй байхыг АНУ-аас хүссэн бөгөөд түүнийг Москватай энхийн хэлэлцээр байгуулахад тодорхой үүрэг гүйцэтгэж магадгүй гэж онцолсон байна.

Эх сурвалж: The Wall Street Journal, BBC

---