Нийслэлийн хүн амын хаврын улирлын хүнсний хэрэгцээнд зориулж 23 аж ахуйн нэгж, нийт 12.6 мянган тонн махны нөөцийг бэлтгэсэн. Тэгвэл энэ сарын 25-ны өдрөөс эхлэн нөөцийн махыг худалдаанд гаргаж эхэллээ.

Үнийн хувьд үхрийн ястай мах килограмм нь 8900 төгрөг, хонины ястай мах кг нь 8300 төгрөг, ямааны мах кг нь 7100 төгрөгөөр 9 дүүргийн 468 хүнсний дэлгүүрээр худалдаалагдаж байна.

Нөөцийн мах худалдаалах үнийг Хүчит шонхор захын энэ оны гуравдугаар сарын бөөний дундаж үнэтэй харьцуулахад үхрийн ястай мах 795 төгрөг буюу 8.2 хувь, хонины ястай мах 772.5 төгрөг буюу 8.5 хувиар, жижиглэнгийн дундаж үнэтэй харьцуулахад үхрийн ястай мах 2968 төгрөг буюу 26.3 хувь, хонины ястай мах 2650 төгрөг буюу 23.0 хувь, ямааны ястай мах 2400 төгрөг буюу 25.2 хувиар тус тус хямд үнэтэй байна. 

Мөн нөөцийн махны үнийг томоохон зах, худалдааны төвд худалдаалж буй махны жижиглэнгийн үнэтэй харьцуулахад үхрийн ястай мах 36 хувь, хонины ястай мах 30.5 хувь, ямааны ястай мах 23.2 хувиар тус тус хямд үнээр нийслэлийн иргэдэд худалдан борлуулахаар бэлтгэл ажлыг бүрэн хангаад байна. 

---