Их Британийн Гадаад хэргийн яам ОХУ-ын "стратегийн гол салбарууд болон хувь хүмүүсийг" онилох 65 шинэ хориг арга хэмжээг зарлажээ.

Үүний хүрээнд, Оросын зургаан банк, дрон үйлдвэрлэдэг батлан хамгаалахын компани, мөн Украины Ерөнхийлөгч Владимир Зеленскийн амийг хөнөөх даалгавар авсан гэгдэж буй Вагнер группт хориг тавьсан байна. Түүнчлэн Украины зүүн өмнөд хэсэгт орших Мелитополь хотын даргыг Оросын цэргийн хүчинтэй "хамтран ажилласан" гэх шалтгаанаар хориг арга хэмжээнд хамруулсан аж.

Харин Их Британи дахь хөрөнгийг нь битүүмжилсэн хүмүүсийн тоонд Роман Абрамовичтэй ойр дотно харилцаатай гэгддэг тэрбумтан, газрын тосны магнат Евгений Швидлер, Оросын хамгийн том банк болох Сбербанкны Гүйцэтгэх захирал Герман Греф болон Оросын Гадаад хэргийн сайд Сергей Лавровын дагавар охин Полина Ковалева нар багтжээ. Ковалева нь Лондонд 4 сая фунт стерлингийн үнэтэй байшин эзэмшдэг гэж эх сурвалжууд мэдээлсэн юм.

Эх сурвалж: The Guardian

---