Нийслэлийн иргэдийн Төлөөлөгчдийн Хурлын ээлжит бус V хуралдаан болж,  Хотын стандарт батлах, “Нийслэлийн судалгаа, шинжилгээний хүрээлэн” төсөвт үйлдвэрийн газар байгуулах, “Улаанбаатар хотын шинэ бүтээн байгуулалт” ХХК-ийг байгуулах тухай болон дүрмийн нэмэлт өөрчлөлт оруулах тухай танилцууллаа.

Хотын стандартыг боловсруулж батлуулах ажлын хэсэг өнгөрсөн оны арванхоёрдугаар сард 14 албан хаагчийн бүртэлдэхүүнтэй байгуулагдсан байна. Тухайлбал, нийгмийн дэд бүтцийн хүрээнд ЕБС, СӨБ болон эрүүл мэндийн байгууллага, төрийн байгууллагын гадна орчны ерөнхий шаардлагыг хангах тухай тус тус хэлэлцсэн байна.

Нийт сургууль, цэцэрлэгийн 70 орчим хувьд гадна орчны шаардлага хангуулснаар сургуулийн насны 238 мянга, цэцэрлэгийн насны 102 орчим хүүхэд эрүүл, ая тухтай орчинд суралцах нөхцөл бүрдэнэ гэв.

Мөн нийтийн эзэмшлийн эд хөрөнгө болох нийтийн бие засах газар, усан оргилуур, хөшөө дурсгал, хүндэтгэлийн самбар, хашаа хайс, хашлага, хүүхдийн тоглоомын талбай, чийрэгжүүлэх талбайн төлөвлөлт зэргийн стандартыг хангуулснаар иргэдийн аюулгүй, цэвэр орчинд эрүүл амьдрах нөхцөл бүрдэнэ гэж үзжээ. Ингэснээр эд хөрөнгийн ашиглалт, хамгаалалт сайжирч, оновчтой төлөвлөснөөр орчны аюулгүй байдал хангагдана гэдгийг НЗД-ын Цахим хөгжил, хууль эрх зүй, төрийн үйлчилгээний асуудал хариуцсан орлогч Р.Дагва онцолж байв.

Нийслэлийн хэмжээнд 1090 хүүхдийн тоглоомын талбай байгаагаас 85 хувь нь буюу 927 засаж янзлах шаардлагатай байгаа аж.

Мөн хотын стандартыг мөрдөж баримтлахад нийтийн тээврийн үйлчилгээ, тавигдах нийтлэг шаардлагыг тогтоох хэрэгцээ бий. Энэ хүрээнд нийтийн тээврийн хувьд үйлчилгээ, төрөл ангилал, тоноглол /хаалга, бариул, орох, гарах гарц/, гадна тал, өнгө үзэмжид тавигдах шаардлага зэргийг шинэчлэхээр баримт бичгийн агуулгад тусгажээ. Дашрамд дурдахад, нийтийн тээврээр өдөрт 400-500 мянган иргэн зорчдог байна.

Мөн амины орон сууц, үер борооны усны байгууламж, хөгжлийн бэрхшээлтэй иргэдэд хүртээмжтэй дэд бүтэц бий болгох, хотын соёл, дуу чимээний соёл, гудамж, зам, барилга байгууламжийн хотжилт, замын тэмдэг тэмдэглэлд стандарт мөрдүүлэх аж.

Хотын стандарт нь үндэсний стандарт, техникийн зохицуулалтын үзүүлэлт, шаардлагад нийцсэн иргэдийн эрүүл, аюулгүй орчинд амьдрах эрхийг хангах, ая тухтай бүтээн байгуулалтыг бий болгоход чиглэсэн байх ёстой. Энэ тогтолцоог бий болгохын тулд эхний шатанд 9 бүлэгт хамаарах 38 хотын стандартыг батлах юм. Үүнд: 

-Хот төлөвлөлт, хот байгуулалт
-Ногоон байгууламж
-“Иж бүрэн гудамж”
-Нийгмийн дэд бүтэц
-Худалдаа, үйлчилгээний газрын гадна орчин
-Нийтийн эзэмшлийн эд хөрөнгө
-Зорчигч тээврийн үйлчилгээ
-Хог хаягдлын менежмент
-Гэрэлтүүлэг, гэрлэн чимэглэл зэрэг багтжээ. 

Хотын стандартыг ийн баталснаар эдийн засагт үзүүлэх нөлөөллийн хувьд богино хугацаандаа төсвийн зардлын хяналтын тогтолцоо сайжирч, өмч хөрөнгийн ашиглалт сайжрах боломжтой бол 3-5 жилдээ буюу дунд хугацаандаа бүтээн байгуулалтын ажилд стандарт хангуулснаар урсгал засварын зардал буурна гэлээ. Харин 10-аас дээш жилдээ буюу урт хугацаандаа нийт үйлдвэрлэл өсч, хотын нийт орлого нэмэгдэнэ, үүнийг дагаад иргэдийн амьжиргаа сайжрахад эерэг нөлөө үзүүлнэ гэж төлөвлөжээ.

 

 

---