Хөгжлийн банкийг шалгасан ажлын хэсгийн тайлан улсын нууцаас гарч олноо ил боллоо. “Хүрээний бузрыг ухвал далай гэсэн үг” хэмээн “Тунгалаг Тамир” романд өгүүлдэгчлэн, 2012-2016 оны хооронд Ардчилсан нам засгийн эрх барих хугацаанд “даахаараа ид” зарчим гайхамшигтай сайн үйлчилснийг олон баримтаас олж харж болохоор байна.

Үүний нэг нь, Хөгжлийн банкны гүйцэтгэх захирал Н.Мөнхбатын гадаад дахь хэт өндөр үнэтэй “зугаалга” ба үүнд нь Эдийн засаг, хөгжлийн сайд Н.Батбаяр цуг оролцож явсан нь анхаарал татаж байна. Н.Батбаярыг УИХ-ын гишүүнээр ажиллаж байхад Н.Мөнхбат туслахаар нь ажиллаж байсан. Гишүүн, туслах хоёрын гадаад томилолтын баримтуудыг танд хүргэе.

Төрийн яам, агентлагийн албан тушаалтнуудын гадаад томилолтын жишиг зардлыг Сангийн сайдын баталсан журмаар зохицуулдаг. Харин, Хөгжлийн банк Гүйцэтгэх захирлын “Албан томилолтын журам”-аар зохицуулдаг байжээ. Гэтэл энэхүү журмаа үл мөрдөн, гадаад томилолтын зардлыг хэт өндрөөр зарцуулах, тодорхой үндэслэл тайлбаргүйгээр их хэмжээний мөнгийг төсөвлөн батлуулж, үрэлгэн зарцуулдаг байсан баримтыг улсын нууцаас гаргажээ.

Тухайлбал, Хөгжлийн банкны гүйцэтгэх захирал асан Н.Мөнхбат гадаад албан томилолттын нислэгээ тогтмол бизнес ангиллаар захиалж байсан байна. 20-30 жил бизнес хийсэн хүн ч бизнес ангиллаар тэр бүр нисээд байдаггүйг жирийн хүмүүс мэднэ. Энгийн нислэгийн ангиллаас хоёр дахин үнэтэй тийзээр тухайн үед төрийн “томчуул” нисэж байсны нэг нь Н.Мөнхбат болон баримтаар ийн үлджээ.

Н.Мөнхбатын Хөгжлийн банкийг удирдсан эхний жил буюу 2012 онд гадаад томилолт, сургалтанд 109 сая төгрөг, 25.190 ам.доллар, 1082 евро, 800 фунт, 7600 рубль, 3832 юань зарцуулжээ.

Энэхүү дүн 2014 онд урамшуулал, шагналд 594 сая төгрөг, гадаад томилолтод 133 сая төгрөг, гадаад сургалтад 16 сая төгрөг, тэмцээн, уралдаанд 136 сая төгрөг буюу нийт 880 сая төгрөг болж нэмэгджээ.

Н.Батбаяр, Н.Мөнхбат нар гадаадад ихэд бийлэгжүү “зугаалдаг” байсан бололтой.

Эдийн засаг, хөгжлийн сайд Н.Батбаяр, Хөгжлийн банкны гүйцэтгэх захирал Н.Мөнхбат нар 2014 онд Санкт-Петербург хотноо хийсэн албан томилолтоор ажиллажээ. Н.Мөнхбат нь зочид буудлын гурав хоногийн төлбөрт 11.925.000 сая төгрөг, тийзэнд 8.985.000 төгрөг зарцуулсан бол Н.Батбаяр сайд Блүүмберг ТВ-ийн телевизийн хөтлөгч, зураглаачийн хамт буудлын төлбөр болох нэг хүний хоногийн 1.224.300 болон замын зардлыг Хөгжлийн банкнаас гаргуулсан байх юм.

Гүйцэтгэх захирал Н.Мөнхбат, сайд Н.Батбаяр нар мөн Бээжин хотод томилолтоор ажиллахдаа Эдийн засаг, хөгжлийн сайд болон орчуулагчийн зочид буудлын зардалд нэг хүний 2.908.350 төгрөг, бусад зардалд 5000 ам.доллар төсөвлөснөө Хөгжлийн банкаар “даалгасан” байх юм.

Цаашилбал, Н.Мөнхбат нь Хонгконгт чуулган уулзалтад оролцох гурав хоногийн нийт зардалд 8.691.703, нэг хоногийн буудлын төлбөр 786 ам.доллар зарцуулжээ.

Хөгжлийн банкны Төлөөлөн удирдах зөвлөлийн нэр бүхий дөрвөн гишүүн болон Төлөөлөн удирдах зөвлөлийн нарийн бичгийн дарга нарын Австрали улсын Сидней хотод 2015 онд болсон дөрвөн өдрийн сургалтын төлбөрт Хөгжлийн банкнаас 91 сая төгрөг төсөвлөж өгчээ.

Үүнээс гадна улсын нууцаас гаргасан тайланд гадаад томилолтын зардлыг гаргахдаа Хөгжлийн банкны Төлөөлөн удирдах зөвлөлийн тогтоол болон Гүйцэтгэх захирлын тушаал давхардан гарч байсан зэрэг олон ноцтой баримтууд авагдсан байх юм.

---