АНУ-ын Сан Франциско орчмын борооны ус зайлуулах хоолойд хоёр өдрийн турш гацсан эрэгтэйг эсэн мэнд аварчээ. Олон цаг үргэлжилсэн энэхүү аврах ажиллагаанд дор хаяж 50 гал сөнөөгч, цагдаа, аврах албаныхан оролцсон байна.

30 гаруй насны тус эрэгтэй нь 40 см-ийн өргөнтэй хоолойд зориудаар орсон бөгөөд нарийн хоолойн хэсэг буюу газар дор 4.5 метрийн гүнд хүрснийхээ дараа гацсан аж. Ингээд тэрээр уг хоолойд хоёр хоног орчмыг өнгөрүүлсэн бөгөөд хажуугаар нь өнгөрч байсан хүмүүс түүний хашхирахыг сонсоод цагдаа нарт дуудлага өгчээ.

Ингээд албаныхан түүнийг өнгөрөгч ням гаргийн 21:30 цагийн орчимд гаргаж авсан ба тэрээр гэмтэж бэртээгүй ч шингэний дутагдалд орсон байсан тул эмнэлэгт хүргэсэн гэж Контра Коста хэсгийн Гал түймрээс хамгаалах албанаас мэдээлсэн юм.

Энэхүү эрсдэлтэй аврах ажиллагааны хүрээнд дөрвөн гал сөнөөгч болон аврах багийнхан хоёр чиглэлээс газар доорх хэсэгт нэвтрэн, модны мөчир, хог хаягдал зэрэг саадыг цэвэрлэн зайлуулсны эцэст хохирогч эрэгтэйд хүрсэн байна.

Эх сурвалж: The Guardian

---