Украин улс НАТО-гийн гишүүн болохгүй гэдгийг хүлээн зөвшөөрөх хэрэгтэй гэж Ерөнхийлөгч Владимир Зеленский мэдэгджээ.

Тэрээр Их Британи тэргүүтэй Нэгдсэн экспедицийн хүчний удирдагчдад хандан үг хэлэхдээ "Украин НАТО-гийн гишүүн биш гэдэг нь тодорхой байна. Бид үүнийг ойлгож байна. Бид олон жилийн турш нээлттэй хаалганы талаар сонссон ч элсэх боломжгүй гэдгийг ч сонслоо. Энэ бол бодит үнэн бөгөөд үүнийг хүлээн зөвшөөрөх ёстой. Ард түмэн маань үүнийг ойлгож, өөрсдөдөө болон бидэнд тусалж буй түншүүддээ найдаж эхэлж байгаад би баяртай байна" хэмээн тэмдэглэсэн байна.

Харин АНУ-ын Төрийн нарийн бичгийн дарга Энтони Блинкен үүнийг буулт биш "бодит байдлын тусгал" гэж тодорхойлжээ. Тэрээр энэ талаар "Би үүнийг буулт гэж бодохгүй байна. Украин өнөө маргаашгүй НАТО-д элсэх боломжгүй гэдэг нь Оросын түрэмгийллийн өмнө ч тодорхой байсан. Ерөнхийлөгч Зеленскийн мэдэгдэл бол бодит байдлын л тусгал" гэж хэлсэн байна.

Түүнчлэн, Ерөнхийлөгч Жо Байден ирэх долоо хоногт Европт айлчилж, НАТО-гийн ээлжит бус уулзалтад оролцон, Оросын түрэмгийллийг "таслан зогсоох, хамгаалах хүчин чармайлтын талаар ярилцах" бөгөөд Европын Зөвлөлийн дээд хэмжээний уулзалтад ч оролцоно гэж Цагаан ордноос мэдээлсэн юм.

Эх сурвалж: The Guardian

---