Засгийн газрын ээлжит хуралдаанаас гарсан шийдвэрүүдийг танилцууллаа. Хуралдаанаар Ерөнхий сайд хүүхдийн өвчлөлтэй холбоотой мэдээлэл сонссон байна. Энэ талаар Эрүүл мэндийн сайд С.Энхболд мэдээлэл өглөө.  

Эрүүл мэндийн сайд С.Энхболд: 

-Засгийн газар эрүүл мэндийн салбар тэр дундаа, эх хүүхэд, эмэгтэйчүүд хүүхдийн чиглэлд тусламж үзүүлж буй эмнэлгүүдийг олон улсын жишигт хүргэх хөрөнгө оруулалтыг хийж байна.

Жилийн 52 долоо хоногоос томуу, томуу төст өвчний өвчлөл жилийн 25 орчим долоо хоногт халдварладаг. Оргил үе нь 5-7 хоног байдаг. Мөн томуу, томуу төст өвчнөөр өвчлөгсдийн 80 орчим хувь нь 0-9 насны хүүхэд байна. Жилдээ 120-130 мянган хүүхэд өвддөг.

Сүүлийн үед хүүхдийн өвчлөлийн улмаас эмнэлгүүд ачаалалтай байгаа тул нийслэлийн есөн дүүргийн амбулаторийг уртасгасан цагаар ажиллуулж, нэмж ор дэлгэж байна. Ор дэлгэхдээ ахмадын тусламж үйлчилгээ үзүүлдэг эмнэлгүүдийн орыг чөлөөлж хүүхдийн тусламж үйлчилгээ рүү нэмж байна.

Мөн ковидын тусламж үйлчилгээ үзүүлдэг амбулаториудыг томуу, томуу төст өвчин рүү шилжүүлэн ажиллаж байна. 

Эцэг, эхчүүд голдуу ажлын бус цагаар хүүхдээ эмнэлэгт авчирч байна. Мөн дийлэнх нь ЭХЭМҮТ-д хандан, энэ эмнэлгийн ачааллыг нэмдэг. Харин Яармагт шинээр барьсан, 500 хүүхдийн ортой эмнэлэг ачаалал багатай байгаа тул энэ эмнэлгээр үйлчлүүлээрэй.                  

-ХӨСҮТ дээр Менингококкт халдварын эсрэг вакциныг ганцхан цэг дээр хийж байгаагаас иргэд удаан хугацаанд дараалж байна. Үүнд ямар арга хэмжээ авах вэ?

-Менингококкт халдвар жил бүр тархдаг. Сүүлийн таван жилд 10 орчим тохиолдол гарсан. Энэ жил СХД-т нэг айлын хоёр хүүхэд Менингококкт халдвар авсан. Харамсалтай нь, нэг хүүхдийнх амь нас эрсдэж, нэг хүүхдийнх нь биеийн байдал маш хүнд байна. Улс даяар 721 хүүхдийн эмч бий. Энэ бол боловсон хүчин дутагдалтай байна гэсэн үг. Тиймээс АШУҮИС дээр 2020 онд хүүхдийн эмчийн ангийг шинээр нээж, одоо 130 хүүхдийн эмч бэлтгэгдэж байна. Цаашдаа хүний нөөцийг нэмэгдүүлэхэд анхаарна.

---