УИХ-ын гишүүн Т.Доржханд УИХ-ын хаврын чуулганаар хэлэлцэх хууль, ОХУ болон Украины дайны асуудал болон Хөгжлийн банкны асуудлаар өөрийн байр сууриа илэрхийллээ. Тухайлбал манай улс парламентын ардчиллаа бэхжүүлж, сонгодог парламентын зарчим руу явах ёстой гэлээ.

УИХ-ын гишүүн Т.Доржханд:

-Нэгдүгээрт Үндсэн хуулийн асуудал бий. Өнөөдөр Украин-Оросын дайны асуудал үүсээд байна.Хоёрхон сарын өмнө Казахстанд ийм зүйл болсон. Монгол орны хувьд хөрш орнуудаа хүндэтгэхийн сацуу хүний эрх, эрх чөлөө, ардчиллаа хангаж ажиллах шаардлагатай. Тиймээс парламентын ардчиллыг бэхжүүлэх ёстой. Иймд үндсэн хуульд өөрчлөлт оруулах зайлшгүй шаардлагатай бөгөөд ХҮН-аас манлайлж шахаж ажиллана.Монгол Улсын тусгаар тогтнол аюулгүй байдал нь ардчилал юм. Нэг хүн, нэг намын засаглал биш юм. Сонгодог парламентын зарчимруугаа явах ёстой.

Улс төрийн намын тухай хууль бас чухал юм. Ил тод, шилэн хөгжилтэй нийгмийг бүтээхийн тулд энэ хуулийн төсөл дээр бүгд анхаарах шаардлагатай. Бид улс төрийн намын тухай хуулийн төсөлд анхаарч ажиллах ёстой. Хөгжлийн банкны асуудал Украины асуудалд дарагдсан. Гэхдээ бид мартаж, эвлэрч болохгүй. Хулгай хийсэн нөхдүүд мөнгөө төлцгөө. Аль нам байх нь хамаагүй.  Хяналт шалгалтын ажлын хэсэгт нь ХҮН-аас орсон. Хулгайгаа нууцад хамруулдаг, тохироод хулгайгаа хийнэ гэж боддог. Авлигыг бууруулахын төлөө бид ажиллах болно. МАН, АН-ын удирдлагуудад хулгай хийсэн нөхдүүддээ хуулийн хариуцлага тооцохоос гадна дахиж нэр дэвшүүлэхгүй байх ёстой. Хаврын чуулган нэлээн “халуухан” болох төлөвтэй байна.

Үндсэн хуулийн цэцэд үндсэн хуулийн нэмэлт өөрчлөлт оруулахаар хандсан. Тухайлбал Сонгуулийн тогтолцоог өөрчилж бэлэг тараадгийг болих хэрэгтэй. Бодлого ярьдаг байя, гишүүдийн тоог өсгөх нь зөв. 76 гишүүн баталсан үеэс хойш хүн амын тоо 1.5 дахин өссөн байна. Мөн Монгол Улсын Ерөнхийлөгч буюу төрийн тэргүүнийг парламентаас сонгодог байя. Шаардлагатай бол  өргөтгөсөн парламент буюу ИТХ-ын төлөөлөгчдөөс сонгодог байя. Иргэдээс сонгогдоод ажлаа булаацалддаг гучин жилийн зовлонг эцэслэе. Мөн ерөнхий сайд нь өөрөө эрх мэдлээрээ дан, давхар дээлтэй ажиллахаа шийддэг байя гэсэн саналууд оруулсан. Эдгээр тогтолцооны өөрчлөлтийг хийх нь зүйтэй гэсэн байр суурьтай байна гэлээ.

---