ОХУ-ын түрэмгийлэл үргэлжилсээр байвал Украины эдийн засаг энэ онд гуравны нэгээс илүү хувиар агшиж магадгүй гэж Олон улсын валютын сан мэдэгджээ.

Тус улсын нисэх онгоцны буудлууд сүйрч, томоохон хотууд их хэмжээний хохирол амсан, дүрвэгсдийн хямрал үүсээд байгаагийн улмаас эдийн засаг нь аль хэдийн 10 хувийн уналтад ороод байгаа билээ. Олон улсын валютын сангийн зүгээс Украинд 1.4 тэрбум ам.долларын яаралтай тусламжийг илгээсэн хэдий ч үүнээс гадна олон тэрбум ам.доллар шаардлагатай гэж үзэж байгаа юм.

Тус сангийн тайланд "Дайн үргэлжилж, нөхцөл байдал маш тогтворгүй хэвээр байгаа тул аливаа урьдчилсан мэдээ нь найдваргүй юм. Гэхдээ Украины эдийн засаг дор хаяж 25-35 хувиар буурна гэж таамаглаж байна" хэмээн тэмдэглэсэн байна. Энэхүү тооцооллыг Ливан, Ирак, Сири зэрэг орнуудын дайны үеийн эдийн засгийг авч үзсэний үндсэн дээр гаргасан байна.

Экспортоос ихээхэн хамааралтай Украины эдийн засаг өнгөрсөн онд 3 хувиар тэлсэн бол энэ онд үйлдвэрлэлийн хэмжээ нь дахин 3.6 хувиар өснө гэж таамаглаж байсан юм. Гэвч одоо тус улсад хүмүүнлэгийн гүн хямрал тулгараад байгаа ба сэргээн босголтын томоохон зардал гарах төлөвтэй байна.

Украины Засгийн газар одоогийн байдлаар батлан ​​хамгаалах болон нийгмийн зардлыг нэн тэргүүнд тавьж байгаа ч гадаад өрийн үүргээ биелүүлсээр байгаа аж. Мөн олон банкны салбарууд хаалгаа барьсан ч компаниуд татвараа төлөн, санхүүгийн системээр нь мөнгө урссаар байгаа гэнэ.

Эх сурвалж: BBC

---