ОХУ-ын Засгийн газар БНХАУ-аас цэргийн техник, тоног төхөөрөмж болон бусад дэмжлэгийг хүссэн гэж АНУ-ын албаны хүн мэдээлжээ. Эдгээр нь чухам ямар тусламж болох нь одоогоор тодорхойгүй байгаа юм.

Ерөнхийлөгч Владимир Путин Украинд түрэмгийлэх тушаал өгснөөс хойш Оросын цэргийн хүчин нийслэл Киев болон бусад томоохон бүс нутгийг эзлэхийг оролдож байгаа ч Барууны дэмжлэгтэй орон нутгийн эсэргүүцлийн улмаас бараг зогсонги байдалд ороод байгаа билээ. Хэдийгээр Орос улс цэргийн давуу байдлаа хадгалж байгаа ч техник хангамжийн алдагдал нь цэргийн үйл ажиллаагааг нь улам хүндрүүлнэ гэж шинжээчид үзэж байна.

Түүнчлэн АНУ болон Европын Холбооны тэргүүтэй хориг арга хэмжээнүүдийн улмаас Москвагийн эрх баригчид Хятадаас эдийн засгийн тусламж хүсэхэд хүрээд байгаа аж. ОХУ-ын Сангийн сайд Антон Силуанов өнгөрөгч ням гарагт өгсөн ярилцлагадаа "Бидний алт, валютын нөөцийн тодорхой хэсэг нь Хятадын мөнгөн тэмдэгт буюу юаниар байгаа" хэмээн тэмдэглэжээ.

Харин АНУ-ын Үндэсний аюулгүй байдлын зөвлөх Жейк Салливан энэ талаар "Бээжин томоохон хэмжээний хориг арга хэмжээ авахаас зайлсхийх эсвэл Орост дэмжлэг үзүүлэх нь ноцтой үр дагаварт хүргэнэ гэдгийг бид тэдэнд шууд илэрхийлсэн. Дэлхийн аль ч улс орон Оросыг эдийн засгийн хориг арга хэмжээнээс аврах гэж оролдохыг бид зөвшөөрөхгүй" гэж онцолсон байна. Тэрээр өнөөдөр Хятадын Гадаад бодлогын дээд албан тушаалтан Ян Жечитэй уулзаж, Орос-Украины асуудлаар хэлэлцэх юм.

Украин дахь түрэмгийлэл эхлээд хоёрхон долоо хоног өнгөрсний дараа цэргийн тусламж хүсэх нь ОХУ-ын цэргийн удирдагчид одоогийн довтолгоог хэрхэн үнэлж байгааг харуулж байна. Хятадын дарга Ши Жиньпин Путиныг хэрхэн дэмжих нь тэдний харилцаа холбоог тодорхой болгож магадгүй. Өмнө нь ихэвчлэн Орос улс Хятадад зэвсэг худалддаг байсан тул энэ удаагийн хүсэлтийг хүлээн зөвшөөрсөн тохиолдолд хоёр улсын динамик өөрчлөгдөх юм.

Эх сурвалж: POLITICO

---