Оросын цэргийн хүчин Украины Мариуполь хотын хүүхдийн эмнэлгийг бөмбөгдсөний улмаас жирэмсэн эмэгтэйчүүд шархдаж, хүүхдүүд нуранги дор дарагдан, маш их хэмжээний хохирол учирсан гэж орон нутгийн албаныхан мэдээлжээ.

Ерөнхийлөгч Владимир Зеленский энэхүү агаарын довтолгоог "харгислал" гэж нэрлэн, "Оросын цэргүүд төрөх эмнэлэгт шууд цохилт өглөө. Нуранги дор иргэд, хүүхдүүд байгаа" хэмээн олон нийтийн сүлжээндээ бичсэн байна. Бүслэлтэд орсон Мариуполь хотын олон мянган энгийн иргэнийг нүүлгэн шилжүүлэхийн тулд харилцан гал зогсоох тохиролцоонд хүрсэн ч Оросын тал ийнхүү халдлага үйлдсээр байгааг тэрээр онцолжээ. 

Бүс нутгийн албаны хүмүүсийн мэдээлснээр, тус эмнэлэг нь агаарын цохилтод хэд хэдэн удаа өртсөн бөгөөд нийт 17 хүн шархадсаны дотор жирэмсэн эмэгтэйчүүд байсан аж.

Украины Гадаад хэргийн сайд Дмитрий Кулеба энэ талаар "ОХУ-ын арми Мариуполь хотын 400 мянга гаруй хүнийг барьцаалж, хүмүүнлэгийн тусламж болон нүүлгэн шилжүүлэлтэд саад болж байна. Бараг 3,000 нярайд эм тариа, хоол хүнс дутагдаж байгаа" хэмээжээ.

Харин Кремлийн хэвлэлийн төлөөлөгч Дмитрий Песков "Ройтерс" агентлагт тайлбар өгөхдөө "Оросын цэргүүд энгийн иргэдийн объект руу гал нээдэггүй" гэж хэлсэн байна.

Эх сурвалж: Reuters

---