“Монгол хүн Монгол хүндээ тусалъя” ТББ-ын тэргүүн Ч.Мөнхбаярыг өнгөрөгч хоёрдугаар сарын 17-нд Тагнуулын ерөнхий газраас дайчлан баривчилж, гэрт нь нэгжлэг хийсэн билээ. 

Улмаар ТЕГ-аас мэдээлэл хийж, иргэн Ч.Мөнхбаярыг гадаадын тусгай байгууллагатай багагүй хугацаанд хамтарч, тэдгээрийн үүрэг даалгаврыг биелүүлж, мөнгөн урамшууллыг тогтмол авч байсан нь тогтоогдсон хэмээн мэдээлсэн юм. Тэгвэл Ч.Мөнхбаярын өмгөөлөгч нар өнөөдөр мэдээлэл хийлээ.

Иргэн Ч.Мөнхбаярын өмгөөлөгч Г.Баасан: 

-Нийтэд ил болсон мэдээллийг үндэслэн үйлчлүүлэгчийнхээ эрх ашгийг хамгаалах үүднээс энэхүү хэвлэлийн хурлыг хийж байна. Тагнуулын ерөнхий газраас гадаадын тагнуултай хамтран ажилласан гэж мэдээлсэн. Тус байгууллага нь гэмт хэргээс урьдчилан сэргийлэх ёстой байтал иргэн Ч.Мөнхбаярыг олон удаа гадаадын тагнуултай уулзсан гэх мэдээлэл өгсөн. Гэтэл иргэн Ч.Мөнхбаяр өөрөө ч мэдэлгүй тухайн иргэнтэй уулзсаны төлөө гадаадын тагнуул хэмээн гүтгүүлсэн. ТЕГ иргэн Ч.Мөнхбаярыг олон удаа гадаадын тагнуултай уулзаж, байсныг мэдсэн юм бол урьдчилан сэргийлж, нэг ч удаа сануулах мэдээлэл өгөөгүй байж, шууд гадаадын тагнуул гэж гүтгэсэн. 

Энэхүү мэдээлэл нь нийгэмд иргэн Ч.Мөнхбаярыг гарцаагүй ял авах нь ээ гэсэн ойлголт төрүүлэх уур амьсгал бүрдүүлсэн нь ЭХХШ тухай хуулийг санаатайгаар зөрчсөн.

ТЕГ-аас иргэн Ч.Мөнхбаярыг үйлдэл дээр нь барьсан гэх боловч гадаадын байгууллагын этгээдийг баривчлаагүй. Яллагдагчаар ч татаагүй. Тэр ч бүү хэл тухайн этгээдийг Гадаадын тагнуулын байгууллагын алба гэдгийг нотлоогүй. Үйлдэл дээрээ баригдсан гэдэг нь нотлогдоогүй байхад ийм мэдээлэл түгээж, түүнийг тагнуул хэмээн зарлаж, яллана хэмээн сүрдүүллээ. Энэ нь эрүү шүүлт тулгах гэмт хэргийн шинжийг агуулсан. 

Тагнуулын байгууллагын мэдээлснээр Ч.Мөнхбаяртай хамт байсан гэх гадаадын тагнуул гэх хүнд яагаад манай улсын хууль үйлчилсэнгүй вэ. Нөгөөтэйгүүр Ч.Мөнхбаяр нь сэтгүүлч хүн. Тиймээс ч улсын нууцыг мэдэхгүй, нууц задруулах боломжгүй. 

Шүүхээр гадаадын тагнуул мөн эсэх, гэрт их хэмжээний мөнгө байсан эсэхийг яг таг нотлоогүй байж тухайн иргэнийг ялтан мэтээр олон нийтэд харуулсан. Тэгэхээр гадаадын хүнтэй харилцсан хүн болгоныг гадаадын тагнуул гэж яллаж, гүтгэх хууль манай улсад хэрэгжиж байна. Гэрт нь нэгжлэг хийхэд тийм их хэмжээний мөнгө байгаагүй. Энэ бол санаатайгаар иргэн Ч.Мөнхбаярыг ялласан хэрэг гэж өмгөөлөгчид нь бид үзэж байна гэлээ.

---