Хоёр жилийн хөл хорионы улмаас хүүхдүүдийн сурах чадвар, хоцрогдол, сургалтын арга барил ямар байгаа, хэрхэн сайжруулах төлөвлөгөөтэй байгааг Хотын дарга тодрууллаа.  

Нийслэлийн Боловсролын  газрын дарга Ж.Гантулга “Өнгөрсөн долоо хоногт нийслэлийн ерөнхий боловсролын сургуулийн ирц 96.1 хувьтай байлаа. Ерөнхий боловсролын сургуулийн 352 хүүхэд, 306 багш, цэцэрлэгийн 133 хүүхэд, 79 багш халдвар авсан. Хичээлийг хоцрогдлыг арилгах тухай Боловсрол, шинжлэх ухааны сайдын тушаал гарч, түүнийг хэрэгжүүлэн ажиллаж байна. Цэцэрлэгийн хүүхдийн нэмэлт элсэлтийг зохион байгуулж, 26.447 хүүхэд цэцэрлэгт элсэж, сургуулийн өмнөх боловсролын хамрагдалт 78 хувьтай байна. Мөн 59 сургуулийн хичээл эхлэх цагт өөрчлөлт оруулсан 14 хоногийн хугацаанд замын хөдөлгөөний өглөөний оргил буюу 08:00 цагийн ачаалал сарнисан” гэв.

Цагийн зохицуулалтыг мөрдөхгүй байгаа “Үй Цай”, “Бритиш”, “Оргил”, “Сакура”, “Хобби”, “Уудам монгол” гэсэн зургаан хувийн сургууль байна. Сургуулиудад цагийн зохицуулалтыг мөрдөж ажиллах мэдэгдлийг хүргүүлжээ.

Жишээлбэл Яармагийн түгжрэлд "Шинэ Монгол Харүмафүжи", "Бритиш", "Сакура" гэх 3 сургуульд хүүхэд хүргэх зорилготой машинуудын ачаалал тодорхой нөлөө үзүүлдэг. Тиймээс эдгээр сургуулийн хичээлийн цагт өөрчлөлт оруулсан. Тодруулбал, "Шинэ Монгол Харүмафүжи" 07:45, "Бритиш" болон "Сакура" сургуулийн хичээл эхлэх цагийг 09:00 цагт болгож зохицуулсан. Гэвч "Бритиш" болон "Сакура" сургууль захирамжийг мөрдөхгүй, хуучин цаг буюу 08.00 цагт хичээлээ эхлүүлсэн хэвээрээ байгаа учраас Яармагийн түгжрэлд тодорхой үр дүн харагдахгүй байгаа юм. 

---