Украины алдарт теннисчин Сергей Стаховский гэр бүлийнхээ хамт Дубайд аялж байх үеэр Оросын цэргийн хүчин Украинд түрэмгийлж эхэлжээ. Ингээд тэрээр эхнэр, гурван хүүхдээ Унгар дахь гэртээ үлдээгээд, эх орондоо буцаж ирэн, нутаг нэгтнүүдийнхээ хамт мөр зэрэгцэн тулалдаж байгаа аж.

36 настай Стаховский одоо Украины нийслэл Киевийг хамгаалахад тусалж буй сайн дурын армид нэгдсэн байна. Оросын цэргүүд хот руу ойртон, айдас түгшүүр тархаад байгаа энэ үед тэрээр юуг ч хийхэд бэлэн байгаагаа "CNN" агентлагт хэлсэн юм.

Өнгөрөгч пүрэв гарагт өгсөн ярилцлагадаа тэрээр "Би энд төрсөн бөгөөд өвөө, эмээ хоёр минь энд нойрсож байгаа. Би үр хүүхдүүддээ ярих түүхтэй үлдмээр байна. Украин дахь хэн ч Орос улс тэднийг чөлөөлөөсэй гэж хүсэхгүй байгаа. Тэдэнд эрх чөлөө, ардчилал бий... Орос зөвхөн цөхрөл, ядуурлыг авчрахыг хүсэж байгаа" хэмээжээ.

Стаховский хэдхэн долоо хоногийн өмнө Австралийн нээлттэй тэмцээний үеэр мэргэжлийн тенниснээс зодог тайлж, 18 жилийн карьераа дуусгасан юм. Харин одоо тэрээр Киевт эх орныхоо төлөө тулалдаж байгаа ч эхнэр, хүүхдүүдээ орхиж явсан нь тийм ч амар шийдвэр байгаагүйг онцолжээ.

Эх сурвалж: CNN

---