Украины Энергодар хотын Запорожийн атомын цахилгаан станц өнөөдөр үүрээр Оросын цэргийн хүчний халдлагад өртөж, станцын ойролцоох сургалтын байр шатаж эхэлсэн билээ. Тэгвэл дөрвөн цаг гаруйн турш дүрэлзсэн энэхүү галыг бүрэн унтраасан болохыг Украины Онцгой байдлын албанаас мэдээлжээ.

Тус албаны мэдэгдэлд "Запорожийн АЦС-ын сургалтын байранд гарсан галыг орон нутгийн цагаар 06:20 цагт бүрэн унтраасан. Энэ явдлын улмаас хүний амь нас хохироогүй" хэмээн тэмдэглэсэн байна. Мөн Энергодарт байлдаан зогссон гэж хотын дарга Дмитрий Орлов зарлажээ.

Оросын цэргүүд тасралтгүй галласны улмаас тус станцад гал гарсан хэдий ч цацраг идэвхт бодис "хэвийн хэмжээнд" байгаа бөгөөд аюулгүй байдлыг бүрэн хангасан гэж албаныхан мэдээлсэн юм. Запорожийн АЦС нь Европын хамгийн том цөмийн станц бөгөөд Олон улсын атомын энергийн агентлаг үүссэн нөхцөл байдалтай холбогдуулан яаралтай тусламжийн төвөө "24/7 бүрэн хариу арга хэмжээ авах горим"-д шилжүүлсэн аж.

❗️❗️Judging by the video from the scene, an administrative building is on fire at the #Zaporizhzhia NPP as a result of shelling. However, the reactors are very close to the shelling site. The shelling continues. pic.twitter.com/CCZiKgclIw

— NEXTA (@nexta_tv) March 4, 2022

Гэхдээ АНУ-ын Эрчим хүчний сайд Женнифер Гранхолм иргэдийг тайван байхыг уриалж, тус байгууламжийн ойролцоох цацрагийн үзүүлэлтүүд нэмэгдээгүй бөгөөд станцын реакторууд "маш сайн хамгаалагдсан ба үйл ажиллагааг нь аюулгүйгээр зогсоосон" гэж мэдэгдсэн байна.

Харин Украины Ерөнхийлөгч Владимир Зеленский Оросын халдлагыг буруушааж, "ОХУ-аас гадна өөр ямар ч улс атомын цахилгаан станц руу галлаж байгаагүй. Энэ террорист улс хүн төрөлхтний түүхэнд анх удаа цөмийн терроризмыг үйлдэж байна" хэмээн хэлжээ.

Эх сурвалж: The Guardian

---