Польшийн "Caritas Poland" буяны байгууллага Украины асрамжийн газруудаас 2,000 өнчин хүүхдийг хүлээн авч, асрахаар болсон бөгөөд эхний ээлжийн 300 хүүхэд өнөөдөр ирнэ гэж мэдэгджээ.

"Манай зүүн хөршид хүмүүнлэгийн сүйрэл тохиогоод байна. Бид Украины хямралд хариу арга хэмжээ авч, тус улсын хамгийн эмзэг бүлгийг аюулгүй байраар хангахаар шийдсэн" гэж тус буяны байгууллагын захирал Марчин Ижицки хэлсэн байна.

Эдгээр хүүхдийн ихэнх нь ОХУ-ын цэргийн хүчний дайралтад хамгийн их өртсөн Украины зүүн хэсгийн асрамжийн газруудаас ирэх бөгөөд тэднийг Польшийн Ополе, Честочова дахь буяны төв, шашны байгууллагуудад байрлуулах аж.

Энэхүү хурцадмал байдал эхэлснээс хойш 660 мянга гаруй хүн Украинаас дүрвэсэн бөгөөд нэг сая хүн гэр оронгүй болно гэж шинжээчид анхааруулж байна. НҮБ-ын тооцооллоор, Украины 12 сая иргэнд тусламж хэрэгтэй болох ба тэдэнд 1.7 тэрбум ам.долларын яаралтай тусламж үзүүлэх шаардлагатай юм.

Эх сурвалж: The Guardian

---