ОХУ болон Украины төлөөлөгчдийн хоёр дахь яриа хэлэлцээр 3 дугаар сарын 2-нд буюу өнөөдөр болохыг Украины "Зеркало Недели" сонин мэдээлжээ.

Хоёр улсын талуудын эхний хэлэлцээр өнгөрөгч даваа гарагт болсон бөгөөд таван цаг үргэлжилсэн билээ. Энэ үеэр Оросын төлөөлөгчид Украиныг Барууны нэгдэлд хамаарахгүй гэх статусаа Парламентын түвшинд тусгаж, энэ асуудлаар бүх нийтийн санал асуулга зохион байгуулахыг шаардсан аж. Үүнээс гадна, Украины эрх баригчдыг Бүгд Найрамдах Донецк Ард Улс болон Бүгд Найрамдах Луганск Ард Улсыг засаг захиргааны хил дээрээ хүлээн зөвшөөрч, Крымийг буцааж авах шаардлагаасаа татгалзахыг хүссэн байна.

Харин Украины тал Оросын цэргийн хүчнийг галаа зогсоож, тус улсын нутаг дэвсгэрээс гарах шаардлага тавьжээ. Эдгээр нөхцөл нь хоёр дахь удаагийн хэлэлцээрт хэвээр үлдэх төлөвтэй байгааг Украины төлөөлөгчдийн нэг хэлсэн юм. 

ОХУ-ын төлөөлөгчдийг Ерөнхийлөгч Владимир Путины зөвлөх Владимир Мединский тэргүүлсэн бөгөөд талууд дараагийн шатны хэлэлцээрийг мөн Беларусь улсад хийхээр тохиролцсоныг тэрээр тэмдэглээд байсан билээ.

Эх сурвалж: TASS 

---