Монгол Улсын Ерөнхийлөгч У.Хүрэлсүхийн санаачилгын дагуу 2022 оны 02 дугаар сарын 23-24-ний өдөр Хөвсгөл нуурыг хамгаалах үндэсний чуулган Төрийн ордонд болж байна.

Энэ үеэр Хөвсгөл аймгийн Засаг дарга Ш.Идэрбаясгалан:

-Хөвсгөл нуурыг бохирдуулж байгаа хүчин зүйл бол ганцхан тэнд байгаа аялал жуулчлалын баазууд гэж ойлгож болохгүй. Хөвсгөл нуур бохирдож эхэлж байгаа гэдгийг тэнд жил бүр очиж амардаг иргэд, нутгийн иргэд хэлэх болсон.

Зөвшөөрөлтэй аялал жуулчлалын үйл ажиллагаа явуулж байгаа компаниудын тусгай зөвшөөрлийг БОАЖЯ-наас олгодог. Сүүлийн жилүүдэд БОАЖЯ-наас газар олголт хийгдээгүй. Гэхдээ Хөвсгөл нуурыг тойрсон аялал жуулчлалын газруудыг цэгцлэх цаг нь болсон. Тус газарт зөвшөөрөлтэй болон зөвшөөрөлгүй компаниуд үйл ажиллагаа явуулж байна. Хууль зөрчсөн газруудын хувьд дээрээс том дарга нараар яриулдаг явдал байгаа. Нэг талаасаа Хөвсгөл нуурыг хамгаалах, нөгөө талаасаа аялал жуулчлалын эко бүс болгон хөгжүүлэх нь зүйтэй.

Зарим аялал жуулчлалын компаниуд нэг га газар авчихаад хоёр га газрыг хашдаг. Үүнээс болоод ан амьтны нуурын уснаас ундаалах боломжийг хаадаг зэрэг сөрөг нөлөө гардаг. Иймд хамгийн эхний ажил бол аялал жуулчлалын газруудын үйл ажиллагааг бодит нөхцөл байдлыг тогтоох хэрэгтэй гэв.

---