ОХУ, Украйны хооронд үүсээд байгаа хурцадмал байдлын улмаас Энэтхэгийн Засгийн газар иргэдээ нүүлгэн шилжүүлж байгаа бөгөөд тусгай нислэгийн онгоц өнөөдөр өглөө Киев рүү нисжээ.

Энэтхэгийн эрх баригчид энэ сарын эхээр Украйн руу орох ба гарах нислэгийн хязгаарлалтыг цуцалсан билээ. Тэгвэл "Air India" компани энэ долоо хоногийн мягмар, пүрэв, бямба гарагт Энэтхэг болон Украйны Бориспил олон улсын нисэх онгоцны буудлын хооронд гурван удаа ниснэ гэж мэдэгдсэн байна.

Түүнчлэн Киев дэх Энэтхэгийн Элчин сайдын яамнаас тусгай нислэгийн талаар зөвлөмж гарган, "Украйнд хурцадмал болоод тодорхойгүй нөхцөл байдал үргэлжилсээр байгаа тул нэмэлт нислэгүүдийг зохион байгуулахаар ажиллаж байна" хэмээн мэдэгджээ.

Өнөөдөр болж өнгөрсөн НҮБ-ын Аюулгүйн зөвлөлийн яаралтай хурлын үеэр Энэтхэгийн суурин төлөөлөгч Т.С.Тирумурти "Энэтхэгийн 20 мянга гаруй оюутан болон иргэн Украйн даяар амьдарч, суралцаж байгаа. Тэдний сайн сайхан байдал бол бидний хувьд нэн тэргүүний асуудал" гэж тэмдэглэсэн юм.

Эх сурвалж: BBC

---