Хатан хаан Элизабетийн коронавирусийн шинжилгээний хариу "Эерэг" гарсан болохыг Букингемийн ордноос мэдэгджээ. Үүнээс долоо хоног гаруйн өмнө, Уэльсийн хунтайж Чарльз цар тахлаар өвчилсөн бөгөөд тэрээр хатан хаантай уулзсан болох нь ил болоод байсан билээ. 

Тэгвэл Виндзорын шилтгээнд оршин суудаг хэд хэдэн хүн халдвар авсан бөгөөд тэдний дунд хатан хаан ч байгаа аж. Букингемийн ордны мэдэгдэлд "Хатан хаанд ханиадтай төстэй хөнгөн шинж тэмдэг илэрч байгаа ч ирэх долоо хоногт зохих үүргээ үргэлжлүүлнэ. Тэрээр эмнэлгийн тусламж авч байгаа ба бид бүх удирдамжийг дагаж мөрдөх болно" хэмээн тэмдэглэжээ.

Ирэх 4 дүгээр сард 96 нас хүрэх Хатан хаан Элизабет өнгөрсөн оны 1 дүгээр сард вакцины эхний тунгаа тариулсан бөгөөд үүнээс хойш дахин хоёр тунд хамрагдсан гэж албаны хүмүүс таамаглаж байгаа юм.

Ерөнхий сайд Борис Жонсон яаралтай мэдэгдэл гарган, "Эрхэмсэг хатан хааныг коронавирусийн цар тахлаас хурдан эдгэрч, эргээд эрүүл энх болохыг би иргэн бүрийн өмнөөс хүсэж байна" гэжээ.

Эх сурвалж: BBC

---