АНУ-ын нэгэн өвчтөн ХДХВ-ийн халдвараас эдгэрсэн анхны эмэгтэй бөгөөд дэлхийн гурав дахь хүн болжээ. Цусны хорт хавдартай тус эмэгтэй нь эс шилжүүлэн суулгах эмчилгээ хийлгэхдээ ДОХ-ын эсрэг байгалийн дархлаатай хүнээс донор авсан ба үүнээс хойш ХДХВ-ийн эсрэг эмчилгээ хийлгэх шаардлагагүй болсон байна.

Сүүлийн 14 сарын турш тус вирусээс ангид байгаа энэхүү өвчтөний талаар эрдэмтэд өнгөрөгч мягмар гарагт Денверт болсон эрүүл мэндийн бага хурал дээр танилцуулсан аж. Гэвч эс шилжүүлэн суулгах аргыг ХДХВ-ийн халдвартай ихэнх хүнд хэрэглэхэд хэтэрхий эрсдэлтэй гэж мэргэжилтнүүд үзэж байгаа юм. Тиймээс энэ удаагийн амжилт нь уг вирусээр өвчилсөн нийт 37 сая хүнийг эмчлэхэд тус болж чадахгүй бололтой.

Эс шилжүүлэн суулгах эмчилгээний боломжит үр дүн анх 2007 онд бүртгэгдэж, Тимоти Рэй Браун гэх эрэгтэй ХДХВ-ийн халдвараас эдгэрсэн анхны хүн болсон билээ. Түүнээс хойш Адам Кастильехо болон энэ удаагийн өвчтөн хоёр л ижил үр дүнд хүрсэн юм.

Эдгээр гурван өвчтөн бүгд хорт хавдартай байсан бөгөөд амь насаа аврахын тулд эс шилжүүлэн суулгах эмчилгээ хийлгэх шаардлагатай болсон. Тэгэхээр ХДХВ-ийн халдвараа эмчлэх нь тэдний гол зорилго байгаагүй ба адил эмчилгээг бусад хүнд хэрэгжүүлэхэд хэтэрхий эрсдэлтэй аж.

Эх сурвалж: BBC

---