Хөгжлийн банкнаас зээл авсан, чанаргүй зээлдэгч нарт хариуцлага тооцох, намын гишүүнээс түдгэлзүүлэх асуудлаар МАН-ын Хяналтын ерөнхий хороо өнөөдөр /2022.02.18/ 11 цагт хуралдана хэмээн зарлаад байсан. Гэвч тус хурал 15 цагаас болж, хойшлогдов.

Хурал товлосон цагаасаа хойшилсон шалтгааныг Монгол Ардын Нам дотроо хэнийг авч үлдэх, аль гишүүнээ түдгэлзүүлэх тухайгаа ширүүхэн хэлэлцэж байгаатай холбон тайлбарлаж байна. Тодруулбал, Хөгжлийн банкны зээлийн асуудлаас гадна өөр төрлийн гэмт хэрэгт холбогдсон, шалгагдаж байгаа намын зарим гишүүдийн гишүүнчлэлийг түдгэлзүүлэх хэмжээний асуудал яригдаж байгаа аж.

МАН-ын Хяналтын ерөнхий хорооны хувьд тус намын 30-р Их Хурлаас байгуулагдсан. Хяналтын ерөнхий хорооны даргаар Б.Баярбаатарыг улираан сонгосон бөгөөд нийт 21 гишүүнтэй юм.  

Хөгжлийн банкны асуудлаар МАН-ын ЕНБД Д.Амарбаясгалан "Албан тушаал эрх мэдлээ ашиглан дээрэмдсэн, залилсан, зээл аваад төлөхгүй, асуудлыг хүндрүүлсэн намын гишүүддээ улстөрийн хариуцлага тооцно" хэмээн байр сууриа илэрхийлж байв.

Тэгвэл мөрдөн шалгах ажиллагааны явцад Хөгжлийн банкны зарим зээлдэгчийг цагдан хорих саналыг АТГ прокурорт хүргүүлсэн нь үнэн. Энэ талаар дэлгэрэнгүй мэдээлэл өгөх хуулийн боломжгүйг АТГ-аас мэдээлээд байна. 

 

---