Австри, Герман улсуудын эрх баригчид коронавирусийн халдварын тархалтыг зогсоохын тулд иргэдээ вакцинжуулалтад зайлшгүй хамрагдахыг шаардаж, татгалзсан хүмүүст торгууль ногдуулах шийдвэрийг хэдхэн долоо хоногийн өмнө гаргаад байсан ч ирэх сараас эхлэн цар тахлын ихэнх хязгаарлалтыг цуцлах болсноо мэдэгджээ.

Эдгээр орон "Омикрон" хувилбарын дэгдэлтээс эмээж байсан ч эмнэлгүүдийн ачаалал мэргэжилтнүүдийн тооцоолж байсан хэмжээнд нэмэгдээгүй юм. Германд өнгөрөгч лхагва гарагт халдварын бараг 220 мянган шинэ тохиолдол бүртгэгдсэн ч долоо хоногийн дундаж нь буурсан болохыг албаныхан онцолсон байна. Тус улсын эрх баригчид ирэх 3 дугаар сарын 20-ныг "Эрх чөлөөний өдөр" байх болно гэж мэдэгдсэн хэдий ч вакцин тариулаагүй хүмүүст зарим хязгаарлалт үйлчилсэн хэвээр байх аж.

Канцлер Олаф Шольц Германы 16 мужийн удирдагчидтай хийсэн дээд хэмжээний уулзалтынхаа дараа "Цар тахал хараахан дуусаагүй байна. Бид вакцинжуулалтыг зайлшгүй шаардлага болгохыг зорьсоор байх олно" хэмээн мэдэгджээ. Гэхдээ энэхүү хуулийн төслийг тус улсын Парламент шийдэх юм.

Харин Австри улсад ирэх сарын 5-наас ихэнх дүрэм журмыг цуцлахаар болжээ. Тус улсын эрх баригчид вакцинжуулалтыг зайлшгүй шаардлага болгох хуулийг энэ сарын эхээр баталж, Европтоо анхдагч орон болоод байсан билээ. Гэхдээ 3 дугаар сарын 16-н хүртэл хэнд ч торгууль ногдуулахгүй бөгөөд тэр хүртэл Засгийн газар энэхүү шаардлагыг түдгэлзүүлэх эсэхээ шийдэх ёстой аж.

Европын ихэнх улс орон "Ковид-19"-ийн хязгаарлалтуудаа сулруулахаар төлөвлөж байна. Швейцарь улсад баар, ресторан болон бусад үйлчилгээний газарт нэвтрэхдээ вакцины гэрчилгээ харуулах шаардлагагүй болсон бол Францын иргэдийг гадуур амны хаалтгүй явахыг зөвшөөрчээ.

Эх сурвалж: BBC

---