АНУ-ын Нью-Йорк мужийн Тиога хэсгээс 2019 онд сураггүй алга болсон охиныг Согертис хотын нэгэн байшингийн шатны доорх "нууц өрөө"-нөөс эсэн мэнд олжээ.

Орон нутгийн цагдаа нар өнгөрөгч даваа гарагт тус байшинд нэгжлэг хийх үеэрээ зургаан настай Пэйсли Шултисыг олсон байна. Пэйслигийн аав, ээж болох Кирк Шултис Жуниор, Кимберли Купер нар эцэг, эх байх эрхээ хасуулсан ч охиныг хулгайлан, нууж байсан нь ийнхүү илэрсэн аж.

Пэйсли Шултис анх 2019 оны 7 дугаар сард дөрвөн настайдаа сураггүй алга болсон бөгөөд тухайн үед албаныхан мөн түүний эцэг, эхийг сэжиглэж байсан юм. Ингээд тэд Кирк Шултис Сениор буюу охины өвөөгийн байшинд нэгжлэг хийсэн ч түүнийг олоогүй байна.

 

Тэгвэл сураггүй алга болсон охиныг Согертис хотод "нууц газарт" байлгаж байгаа гэх мэдээллийг хүлээж авсныхаа дараа цагдаа нар тус байшинд дахин нэгжлэг хийжээ. Энэ үеэр нэгэн мөрдөгч байшингийн шат хачирхалтай загвартай байгааг анзаарч, хэд хэдэн банзыг авсан бөгөөд улмаар Кимберли Купер охинтой хамт нуугдаж байгааг олсон байна.

Энэхүү "нууц өрөө" нь жижиг, хүйтэн бөгөөд чигтэй байсан гэж цагдаа нар тодорхойлсон ба түргэн тусламжийн баг Пэйсли охинд яаралтай үзлэг хийжээ. Одоо түүний биеийн байдал сайн байгаа бөгөөд хууль ёсны асран хамгаалагч болон төрсөн эгчтэйгээ хамт байгаа гэж албаныхан мэдээлсэн юм.

Харин охины эцэг, эх болон өвөөг нь баривчилсан бөгөөд тэднийг хүүхэд хулгайлж, сайн сайхан байдалд нь аюул учруулсан гэх хэрэгт буруутгаж байна.

Эх сурвалж: BBC

---