ОХУ-ын сөрөг хүчний удирдагч Алексей Навальныйг дахин өөр хэрэгт буруутгаж, түүний хоригдож буй Покров хотын чанга дэглэмтэй хорих газарт шүүх хурал зохион байгуулжээ.

Өнгөрөгч мягмар гарагт эхэлсэн шүүх хурлын үеэр прокурорууд Навальныйг улс төрийн байгууллагууддаа хүлээж авсан 4.7 сая ам.долларын хандивыг залилсан хэрэгт буруутай гэж мэдэгдсэн бөгөөд хэрэв гэм буруу нь тогтоогдвол тэрээр дахиад арав гаруй жил хоригдож магадгүй юм. Одоо тэрээр хөрөнгө шамшигдуулсан хэргээр гурван жил хагасын ял эдэлж байгаа ба сүүлийн нэг жилийг торны цаана өнгөрөөсөн билээ.

Түүнчлэн энэхүү шүүх хуралд түүний эхнэр Юлия Навальная хүрэлцэн ирж, түүнд дэмжлэг үзүүлсэн байна. Навальный мэдүүлгийнхээ үеэр "Та нар миний хорих ялыг тодорхойгүй хугацаагаар сунгах гэж төлөвлөж байгаа. Үүний эсрэг би юу хийж чадна гэж? Иргэдийн амьдрал нэг хүний ​​хувь заяанаас илүү чухал. Би айхгүй байна" хэмээн хэлжээ.

АНУ-ын Төрийн нарийн бичгийн дарга Антони Блинкен энэхүү шинэ ялыг "эргэлзээтэй" гэж нэрлээд, Навальныйг суллахыг Оросын эрх баригчдаас хүссэн байна.

Эх сурвалж: BBC

---