Бельгийн ажилтнууд цалингаа хасуулахгүйгээр ажлын дөрвөн өдрийн горимд шилжих боломжтой болсныг тус улсын Засгийн газар өнгөрөгч мягмар гарагт мэдэгджээ.

Энэхүү хөдөлмөрийн шинэ гэрээнд ажлын цаг болон ажлын газрын байршлыг илүү уян хатан болгохоор тусгасан байна. Ажилтнууд хоногт илүү цагаар ажиллаж, гурван өдөр амрах хүсэлтийг ажил олгогчдоо гаргах хэрэгтэй бөгөөд ажил олгогч нь үүнээс татгалзах боломжтой ч шалтгаанаа тайлбарласан албан бичгийг өгөх ёстой аж. 

Түүнчлэн иргэд өдөрт дээд тал нь 9.5 цаг ажиллах боломжтой ба хэрэв компани болон үйлдвэрчний эвлэлээс зөвшөөрсөн тохиолдолд энэ хэмжээг 10 цаг хүртэл сунгаж болох юм.

Бельги улс уг төслийг өнгөрсөн оны 10 дугаар сараас хойш албан ёсоор хэлэлцэж эхэлсэн нь зарим талаараа коронавирусийн цар тахалтай холбоотойгоос гадна ажлын байрны уян хатан байдлыг нэмэгдүүлэхийг ч зорьжээ.

Тус улсын Ерөнхий сайд Александр Де Кроо энэ талаар мэдэгдэхдээ "Бид хүнд хэцүү хоёр жилийг тууллаа. Хөдөлмөрийн шинэ гэрээний хүрээнд бид илүү шинэлэг, тогтвортой, дижитал эдийн засагт эхлэл тавьсан. Хэдийгээр коронавирус нь ажилтнуудад сөргөөр нөлөөлсөн ч үр дүнд нь иргэд илүү уян хатан байдлаар ажиллаж, хувийн амьдрал болон ажлаа хослуулж сурсан билээ. Тиймээс ч бид ажлын шинэ арга барилд хүрсэн" хэмээн онцолсон байна.

Эх сурвалж: UPI

---