Бэлэн байдлын зэргээ цуцалж, хилээ нээсэн нь манай улс гадаадын аль ч орны жуулчинд нээлттэй гэсэн үг. Гэвч жуулчдын хамгийн түрүүнд зорин ирэх Сүхбаатарын талбай, Төрийн ордоны урд талын хэсэг цуурч, хэд хэдэн газраа хагарал үүсчээ.

Энэ үзэмжгүй байдлыг зарим иргэд шүүмжилж, засаж янзлахыг зөвлөж байна.

БОАЖЯ-наас зохион байгуулсан "Шинэ сэргэлтийн бодлого-Аялал жуулчлал" хэлэлцүүлгийн үеэр БНХАУ, ОХУ-ыг зорих гэж буй жуулчдыг Монгол руу татаж, эхний ээлжинд 200 мянган жуулчин хүлээн авна гэдгээ илэрхийлсэн. Ингэхдээ Монгол улс руу зорчих аялал үнэтэйд тооцогддогийг салбарынхан онцолж байв. Удахгүй манай улсад ирэх жуулчдаас тодорхой хэмжээний хураамж авч, аялал жуулчлалын санд төвлөрүүлэхээ ч төлөвлөсөн байдаг.

Хотын өнгө үзэмжийг гутаасан ялихгүй мэт хэрнээ нөлөө үзүүлэх хэсгийг холбогдох газрууд анхааралдаа авч засварлах шаардлагатай. Гадаадын болоод дотоодын жуулчдын хамгийн түрүүнд зорин ирж, сонирхон үзэх газар бол яах аргагүй Сүхбаатарын талбай. Иймд Төрийн ордоны урд талын цуурсан тухайн хэсгийг засч янзлах шаардлага ийнхүү үүсээд байна. 

 

 

 

---