Францын баруун өмнөд хэсгийн худалдааны байгууламжид хүчтэй дэлбэрэлт болсны дараа ойролцоох орон сууцны барилгуудад гал гарч, улмаар долоон хүн амь үрэгдэж, 20 орчим хүн шархадсан байна.

Пиреней-Дорно бүсийн Гал унтраах албаны мэдээлснээр, дэлбэрэлт Сент-Лоран-де-ла-Саланк хотод өнгөрөгч даваа гаргийн 01:30 цагт болсон бөгөөд дараа нь гудамжны хоёр талд байрлах хэд хэдэн барилга галд автжээ. Дэлбэрэлтийн шалтгаан одоогоор тодорхойгүй байгаа юм.

Гал сөнөөгчид ослын улмаас эвдэрч, нурсан хоёр жижиг байшингийн нуранги дороос хохирогчдыг хайсаар байгаа ба амь үрэгдэгсдийн тоо өснө гэж эмээж байна. Мөн амиа алдсан иргэдийн дунд хоёр хүүхэд байсныг албаныхан онцолжээ. 

Францын Дотоод хэргийн сайд Жеральд Дарманин ослын газарт очиж, үзлэг хийснийхээ дараа "Дэлбэрэлт санамсаргүй явдал эсвэл гэмт хэргийн шинжтэй эсэхийг прокуроруудад одоогоор тодорхойлох боломжгүй байна" хэмээн мэдэгдсэн юм.

Эх сурвалж: BBC

---