Английн нийслэл Лондон хотын зүүн хэсэгт байрлах нэгэн уушны газрын хоёр давхрын шал нурсны улмаас 13 хүн бэртэж гэмтжээ.

Хакни Вик дэх "Two More Years" уушны газарт өнгөрөгч бямба гарагт болсон энэхүү ослын дараа орон нутгийн түргэн тусламжийн баг болон гал сөнөөгчид яаралтай ирж, нурангид дарагдсан долоон хүнийг аварсан байна. Ослын улмаас гэмтсэн дөрвөн хүнийг эмнэлэгт хүргэсэн гэж албаныхан мэдээлсэн юм.

Хохирогчдын дундаас хамгийн хүнд бэртсэн Жеймс Пурдон "ВВС" агентлагт өгсөн ярилцлагадаа "Би маш их зүйлд дарагдсан учир амьсгалахад хүндрэлтэй болж эхэлсэн. Ямар ч хүчгүй болсон тул тусламж хүсэж орилж ч чадаагүй" хэмээн ярьжээ. Тэрээр аврагдсаныхаа дараа ч огт хөдөлж чадаагүй бөгөөд нуруу, өвдөг, шагайдаа гэмтэл авсан байна.

Одоо бүс нутгийн Онцгой байдлын алба болон бүтцийн инженерүүд тус хувийн өмчийн барилгыг шалган, үнэлгээ өгч байгаа гэж албаныхан тэмдэглэсэн юм. Түүнчлэн тус уушны газрыг цагдаагийн хамгаалалтад авсан ба хэзээ дахин нээгдэх нь тодорхойгүй байна.

Эх сурвалж: BBC

---