Бүх шатны боловсролын байгууллагын үйл ажиллагаа өнөөдрөөс /2022.02.14/ жигдэрсэн. Үүнтэй холбоотойгоор өглөөний 07:00-10:00 цагийн хооронд 100 000 тээврийн хэрэгсэл замын хөдөлгөөнд оролцож, ачаалал эрс нэмэгджээ.  

ТЦА-ны урьдчилан сэргийлэх хэлтсийн зохицуулагч, ахмад Б.Энхболд: Өглөөний 07:30-аас замын хөдөлгөөний ачаалал эрс нэмэгдсэн. Монгол Улсад 1,4 сая автомашин бүртгэгдсэнээс нийслэл хотод 500-600 мянга нь байдаг. Сургууль цэцэрлэг амрах үеэр 300-400 мянган машин замын хөдөлгөөнд оролцож байсан бол хичээл орох үеэр 500-600 мянган машин бүрэн хөдөлгөөнд оролцдог. Өнөөдөр өглөө автоматаар 100 мянган автомашин замын хөдөлгөөнд нэмэгдэж оролцсоноор түгжрэл ихээр үүслээ. 

Хамгийн их түгжрэлтэй хэсэг ЕБС-ийн орчимд л байна. ТЦА сургуулиуд, эцэг эхчүүдтэй хамтран ажиллаж эхэлсэн. Нийслэлийн боловсролын газраас зарим сургуулийн хичээл эхлэх, тарах цагийг өөрчлөх судалгаа хийсэн. Манайх ч саналаа хүргүүлсэн. Энэ хэрэгжвэл түгжрэл 20-25 хувиар буурах тооцоолол гарсан. 

Сүүлийн жилүүдэд автомашины болон жолоочийн тоо өссөөр байна. ТЦА-нд өдөрт дунджаар 300-400 зам тээврийн ослын дуудлага ирдэг. Нийслэлд 200-250 цэгт осол гаргасаар байна. Энэ нь түгжрэлд нөлөөлсөөр байна. 

---