Энэтхэгийн өмнөд хэсгийн Курумбачи толгодын эгц хавцлын ан цавд 48 цагийн турш гацаж, ус, хоолгүй байсан эрэгтэйг тус улсын армийн уулчид аварчээ. 305 метр өндөр тус толгод нь эгц уулархаг тогтолцоогоороо алдартай юм.

23 настай Р Бабу нь өнгөрөгч даваа гарагт гурван найзынхаа хамт явган аялал хийж байгаад халтирч унасан бөгөөд азаар хадны завсарт тогтож үлдсэн байна. Найзууд нь түүнийг саваа, олсоор татаж гаргахыг оролдсон ч чадаагүй тул толгодоос буун, цагдаа нараас тусламж гуйжээ.

Аврах ажиллагааг гурван өөр баг гүйцэтгэсэн боловч нэг нь ч амжилт олоогүй бөгөөд түүнд ус болоод хоол хүнс ч хүргэж чадаагүй байна. Орон нутгийн Эргийн хамгаалалтын албаныхан түүнд хүрэхээр мягмар гарагт хэд хэдэн нислэг үйлдсэн хэдий ч газар нутгийн тогтолцооны улмаас бүтэлгүйтсэн аж.

Ингээд Керала мужийн Ерөнхий сайд тусламж хүссэний дараа Энэтхэгийн армийн багийг аврах ажиллагаанд дайчилсан бөгөөд уулчид лхагва гаргийн өглөө Р Бабуг амжилттай аварч, эмнэлэгт хүргэжээ.

Албаны эх сурвалж энэ талаар "Армийн бие бүрэлдэхүүн Р Бабугийн ойролцоо хүрч, түүнд ус, хоол хүнс өгсөн. Үүний дараа, аврах багийн гишүүн түүнийг хамгаалалтын хэрэгсэлд бэхлэн, уулын оройд гаргасан" хэмээн "Manorama" агентлагт мэдээлсэн байна.

Эх сурвалж: BBC

---