Хэдэн жилийн өмнөөс Хан-Уул дүүргийн иргэд Яармагт үлдсэн ганц хоосон газраа авч үлдэхээр сэтгэлээ чилээсээр өдийг хүрчээ. Тэдний сэтгэл чилсэн учир нь Яармагийн Нэгдсэн эмнэлгийн урд байрлах 2.7 га газрыг эрх мэдэлтэй, мөнгөтэй хүмүүс өөрийн болгож авахаар улайрч байгаа явдал юм.

Өнөөдөр Яармагийн иргэд барилга бариагүй, хашаалаагүй үлдсэн 2.7 га газраа авч үлдэхийн тулд шүүхийн шийдвэрийг хүлээн зогсож байна.

Учир нь Кёкүшюзан Д.Батбаяр, Улсын заан Ч.Батзориг нарын хамаарал бүхий “Эс Си Эм” компани тус газарт барилга барихаар өнгөрсөн хавар газар шорооны ажил эхэлсэн байсныг иргэд эсэргүүцнээр түр зогсоод байгаа аж. Гэвч тус компани барилгын ажлаа үргэлжлүүлэхийн тулд улсын мэдэлд байсан газрыг авахаар гомдол гаргасныг өнөөдөр шүүх хуралдан шийдвэрлэхээр болоод байгаа нь энэ юм.

Тус газарт хотын захиргаанаас цэцэрлэгт хүрээлэн барихаар захирамж гаргасан байдаг ч гурван удаагийн шүүх хурлаар улсын мэдэлд байсан газрыг өөрийн болгосон байна. Үүнийг нь хотын дарга газрын эрхийг цуцлах захирамж гаргасан ч “Эс Си Эм” компани үүнийг нь эсэргүүцэн шүүхдэж байгаа аж.

Иргэдийн хувьд “Одоо энэ газраа шүүхдээд алдмааргүй байна. Анх 8.4 га газар байснаас үлдсэн нь энэ 2.7 га газар. Энэ газарт барилга барих юм бол эмнэлэг, цагдаа, хороо, сургууль, цэцэрлэгт хүрч, очиход хүндрэл гарахаар байна. Хүмүүсийн аюулгүй байдал энэ хэрээр алдагдана” гэлээ.

---