Канадын нийслэл Оттавад тээврийн жолооч нарын тэргүүтэй эсэргүүцлийн хөдөлгөөн үргэлжилсээр байгаа тул тус хотын дарга Жим Уатсон онц байдал зарлажээ.

Жагсагчид цагдаа нараас тоогоор илүү байгаа бөгөөд тэдний улмаас хот "хяналтаас бүрэн гарсан" гэж ноён Уатсон тэмдэглэсэн байна. Мөн эдгээр жагсаа цуглаан нь оршин суугчдын аюулгүй байдалд заналхийлж байгаа гэж эрх баригчид үзэж байгаа юм.

Коронавирусийн эсрэг вакцинжуулалт болон бусад хязгаарлалтыг эсэргүүцсэн тээврийн жолооч нар Оттава хотын төвийг автомашин, майхнаар хаан, замын хөдөлгөөнийг зогсонги байдалд оруулаад байгаа билээ. "Эрх чөлөөний цуваа" хэмээн нэрлэсэн энэхүү хөдөлгөөнд нэгдсэн иргэд Канадын Засгийн газрын хэрэгжүүлж буй хязгаарлалтуудыг эсэргүүцэн, долоо хоног гаруйн турш жагссаар байгаа юм.

Онц байдлын хүрээнд, цагдаа нар хуулийн хэрэгжилтийг чангатгаж, жагсагчдад туслахыг хүссэн хүмүүсийг баривчлах зэрэг арга хэмжээ авна гэжээ. Мөн бүс нутгийн онцгой байдлын албаныханд нэмэлт эрх мэдэл олгож, шаардлагатай тоног төхөөрөмжид нэвтрэхийг зөвшөөрөх аж.

Эрх баригчдын мэдээлснээр, Оттавагийн ихэнх оршин суугч эдгээр жагсаал цуглааныг эсэргүүцэж байгаа юм. Хууль хяналтынхан одоогийн байдлаар хэд хэдэн хүнийг баривчилж, олон тооны автомашиныг хураан аваад байна.

Эх сурвалж: BBC

---