Тэтгэвэр, тэтгэмжийг нэмэхээр тусгасан Монгол Улсын нэгдсэн төсвийн 2022 оны төсвийн хүрээний мэдэгдэл, 2023-2024 оны төсвийн төсөөллийн тухай хуульд өөрчлөлт оруулах тухай хуулийн төсөл, хамт өргөн мэдүүлсэн хуулийн төслүүдийг УИХ-ын ээлжит бус чуулганаар өнөөдөр эцэслэн баталлаа. Харин ХНХ-ын сайд А.Ариунзаяа маргааш өдөр тэтгэврийн дансанд хийнэ, эрт банк руу очихгүй байхыг зөвлөлөө.

“Харин Улсын Их Хурлын дарга гарын үсэг зурж ёсчлон батлах ёстой.  Ёсчилсон хуулийг Монгол Улсын Ерөнхийлөгчийн Тамгын газарт илгээж Монгол Улсын Ерөнхийлөгч хориг тавих эсэх асуудлыг шийдвэрлэх үүрэгтэй. Харин хууль, тогтоолыг "Төрийн мэдээлэл" эмхэтгэлд албан ёсоор нийтэлсний дараа хууль хүчин төгөлдөр мөрдөгдөж эхлэх юм. Дээрх бүх процесс одоо хийгдэж байгаа бөгөөд хүн бүхэн хичээн ажиллаж байна. 

Засгийн газар үүний дараа хуралдаж яг хэдэн төгрөгөөр яаж нэмэх талаар тогтоол батална.Тогтоолын дагуу бид тооцооллоо банкуудад өгч, банкууд 465 мянган иргэний дансанд нэмэгдүүлсэн тэтгэврийг байршуулна. 

Яг шууд маргааш өглөө дансанд байршихгүй ч, өдөртөө багтаахыг бид хичээнэ ээ. Ахмад, буурлууд маань эрт банкруу явахвий. Үр хүүхдүүд нь дансыг нь эхлээд шалгаж өгөөрэй. Бид чинь бүх тэтгэврийг дансанд хийдэг болчихсон шүү дээ. Дахиад жаахан хүлээзнээрэй” хэмээн ХНХ-ын сайд А.Ариунзаяа өөрийн цахим хуудасдаа нийтэлжээ.

---