Италийн эвслийн намууд шинэ Ерөнхийлөгчид тохирох нэр дэвшигчийн талаар тохиролцож чадаагүйн улмаас Ерөнхийлөгч Сержио Маттарелла улиран сонгогджээ.

Ромд зургаан өдөр үргэлжилсэн санал хураалтын дараа Ерөнхийлөгч Маттарелла өнгөрөгч бямба гарагт албан ёсоор дахин сонгогдсон байна. 80 настай тэрээр албан тушаалаа орхих хүсэлтэй байгаагаа илэрхийлээд байсан ч Ерөнхий сайд Марио Драги түүнийг Италийн "тогтвортой байдлын" төлөө үлдэхийг ятгасан гэж орон нутгийн хэвлэлүүд мэдээлсэн юм.

Ноён Маттарелла албан ёсны мэдэгдэлдээ "Манай улсын өмнө тулгараад байгаа эрүүл мэнд, эдийн засгийн сорилтуудын улмаас би албан тушаалдаа үлдэх хариуцлагатай. Ард түмнийхээ өмнө хүлээсэн үүрэг минь миний хувийн сонголтоос давамгайлах ёстой" хэмээн тэмдэглэжээ.

Гүн хуваагдмал байдалтай болсон Италийн Засгийн газрын эрх баригч эвслийн намууд долоон удаагийн санал хураалтаар өөр нэр дэвшигчийг сонгож чадаагүй тул Сержио Маттареллаг улираан сонгохоор тохиролцсон байна. Тус улсын Ерөнхийлөгчийг 1,009 сенатор, Парламентын гишүүд болон бүс нутгийн зарим төлөөлөгчөөс бүрдсэн сонгуулийн коллеж нууц санал хураалтаар сонгодог аж.

Үндсэн хуулийн цэцийн шүүгч асан Маттарелла өнгөрсөн долоон жилийн хугацаанд иргэдийн хайр хүндлэлийг хүлээсэн Ерөнхийлөгч болсон хэдий ч дараагийн долоон жилийн хугацаанд албан тушаалаа бүрэн хаших эсэх нь тодорхойгүй байна. Зарим шинжээчдийн үзэж байгаагаар, тэрээр 2023 оны сонгуулийн дараа Ерөнхий сайд Драгид зай тавьж өгч магадгүй юм.

Эх сурвалж: BBC

---