Африкийн өмнөд хэсгийг "Ана" хар салхи дайрсны улмаас их хэмжээний үер бууж, 70 гаруй хүн амиа алдсан байна. Мөн Энэтхэгийн далайд дахин шуурга дэгдэж байгаа бөгөөд ойрын өдрүүдэд эх газарт хүрч болзошгүйг бүс нутгийн цаг уурын албаныхан анхааруулж байгаа юм.

"Ана" хар салхи өнгөрөгч даваа гарагт Мадагаскарт хүрсэн бөгөөд үерийн улмаас багадаа 48 хүн амь үрэгдэж, 130 мянган хүнийг нүүлгэн шилжүүлэх шаардлагатай болжээ. Нийслэл Антананариву хотын сургууль, биеийн тамирын заалуудыг яаралтай хоргодох байр болгож, иргэдийг тусламж үйлчилгээ үзүүлж байгаа аж. 

Малавид 11 хүн нас барж, олон тооны хүн бэртэж гэмтсэн ба гэр оронгүй болсон хүмүүст зориулж онцгой байдлын 44 байршлыг байгуулсан байна. Мөн тус улс даяар тог цахилгаан тасарсан тул байгалийн гамшгийн онц байдал зарлажээ.

Харин Мозамбикт 18 хүн нас барсан гэж эрх баригчид мэдээлсэн юм. Хар салхи тус улсын 10 мянган байшин, олон арван сургууль, эмнэлгийг нурааж, цахилгаан дамжуулах шугамуудыг сүйтгэжээ.

Ерөнхий сайд Карлос Агостиньо до Росарио тус бүс нутаг дахь цаг агаарын эрс тэс үзэгдлийн давтамж, эрч нэмэгдэж байгааг онцлон, "Бид уур амьсгалын өөрчлөлтөд маш бага хэмжээний нөлөө үзүүлдэг ч хамгийн их хохирч буй орнуудын нэг" хэмээн мэдэгдсэн байна.

НҮБ-ын Хүүхдийн Сангаас ойролцоогоор 45 мянган хүнд яаралтай тусламж хүргэхийн тулд орон нутгийн ажилтнуудаа байршуулж байгаа аж.

Эх сурвалж: BBC

---