Швед улсын эрх баригчид 5-12 насны хүүхдүүдийг коронавирусийн эсрэг вакцинжуулалтад хамруулахыг санал болгохгүй байхаар шийджээ. Тус улсын Эрүүл мэндийн агентлагийн мэдээлснээр, вакцины хүүхдүүдэд үзүүлэх ашиг тус эрсдэлээс нь бага аж.

Энэхүү агентлагийн төлөөлөгч Бритта Бьорхолм өнгөрөгч пүрэв гарагт болсон хэвлэлийн бага хурлын үеэр "Хүүхдүүд цар тахлын улмаас ноцтой өвчлөх эрсдэл багатай гэдгийг бид мэдэж байгаа тул тэднийг вакцинжуулах нь тодорхой ашиг тустай гэж үзэхгүй байна. Гэхдээ судалгаа өөрчлөгдсөн, эсвэл илүү аюултай, шинэ хувилбар гарч ирсэн тохиолдолд шийдвэрээ эргэн харж болно" хэмээн тэмдэглэсэн байна.

Одоогийн байдлаар, Шведэд өндөр эрсдэлтэй бүлгийн хүүхдүүдэд вакцин тарьж эхлээд байгаа юм. Тус улсад коронавирусийн шинжилгээний хүчин чадал хязгаарлагдмал байгаа хэдий ч энэ сарын 26-нд халдварын 40 мянга гаруй шинэ тохиолдол бүртгэгджээ.

Цар тахлын дөрөв дэх давлагаа нь өдөр тутмын тохиолдлын тоог хамгийн дээд хэмжээнд хүргэсэн ч эрүүл мэндийн тусламж үйлчилгээ өмнөх үеийнхтэй адил дарамтад ороогүй байгаа юм. Гэхдээ Шведийн Засгийн газар хатуу дүрэм журмыг сунгаж, ресторануудын ажиллах цагийг хязгаарлан, зөвхөн цөөн тооны иргэнийг нэг дор цугларахыг зөвшөөрсөн байна.

Эх сурвалж: Reuters

---