Монгол улсын Ерөнхийлөгч У.Хүрэлсүхийн зүгээс инфляцын түвшин нэмэгдэж, 2021 онд улсын хэмжээнд 13.4 хувьд хүрсэн нь бага, дунд орлоготой иргэдийн амьжиргааг хамгаалах үүднээс Засгийн газраас ахмад настан, хөгжлийн бэрхшээлтэй иргэд, өрх толгойлсон эцэг, эхчүүд болон бусад халамж нэн шаардлагатай иргэдийн тэтгэвэр, тэтгэмжийг нэмэгдүүлэхэд чиглэсэн тодорхой шийдлийг яаралтай боловсруулж, хэрэгжүүлэн ажиллахыг чиглэлийг өчигдөр өгсөн.  

Үүний дагуу Сангийн яам төсөвт тодотгол хийхгүйгээр, тэтгэвэр тэтгэмж нэмэгдүүлэх ямар арга зам байгааг судалж байгаа гэх мэдээлэл байна. Улмаар Сангийн яамнаас шийдвэр гарангуут Засгийн газар ээлжит бусаар хуралдах учиртай. Гэхдээ сар шинийн өмнө ээлжит бус чуулган зарлаж, төсөвтөө тодотгол хийж байж тэтгэвэр нэмэх боломж бүрдэх юм. Тэгвэл Монгол Улсын Их Хурлын ээлжит бус чуулганыг 2022 оны нэгдүгээр сарын 28-ны өдрөөс хоёругаар сарын 1-ний өдрүүдэд хуралдуулах Улсын Их Хурлын дарга Г.Занданшатарын захирамж гарлаа.

Ээлжит бус чуулганаар:

• Монгол Улсын 2022 оны төсвийн тухай хуульд нэмэлт, өөрчлөлт оруулах тухай,
• Нийгмийн даатгалын сангийн 2022 оны төсвийн тухай хуульд нэмэлт, өөрчлөлт оруулах тухай,
• Эрүүл мэндийн даатгалын сангийн 2022 оны төсвийн тухай хуульд нэмэлт, өөрчлөлт оруулах тухай,
• Ирээдүйн өв сангийн 2022 оны төсвийн тухай хуульд нэмэлт, өөрчлөлт оруулах тухай хуулийн төслүүдийг хэлэлцэнэ.

Чуулган маргааш буюу баасан гарагийн 14.00 цагаас эхлэх юм.

---