Москва, Киевийн элч нар өнгөрөгч лхагва гарагт Парист болсон хэлэлцээрийн үеэр Украйны зүүн хэсэгт харилцан гал зогсоох амлалтаа хадгалж, цаашид яриа хэлэлцээрээ үргэлжлүүлэхээр тохиролцжээ.

ОХУ "НАТО"-гийн зүүн Европ дахь өргөжилтийг зогсоохын тулд Украйн руу довтлохоор төлөвлөж байгаа гэх болгоомжлол Барууны орнуудын дунд тархаад байгаа билээ.

Тэгвэл эдгээр хоёр улсын төлөөлөгчид Франц, Германы зуучлалаар найман цаг гаруйн турш хэлэлцээр хийж, адил дүгнэлтэд хүрсэн нь "сайн дохио" гэж Францын дипломатч хэлсэн байна.

Гэвч энэ удаагийн уулзалтаар Украйны зүүн хэсэгт 2014 оноос хойш өрнөж буй салан тусгаарлагчдын тэмцлийг зохицуулах тухай хэлэлцсэн бөгөөд Оросын түрэмгийллийн аюулын тухай дурдаагүй гэж Францын Ерөнхийлөгч Эммануэль Макроны туслах тэмдэглэжээ. Дараагийн шатны хэлэлцээр ирэх 2 дугаар сарын хоёр дахь долоо хоногт Германы Берлин хотноо болох аж.

Энэхүү яриа хэлэлцээр "хялбар биш" байсан гэж Украйны элч Андрей Ермак сэтгүүлчдэд хэлжээ. Харин Кремлийн төлөөлөгч Дмитрий Козак уг дөрвөн талт хэлэлцээрийн гол үр дүн нь харилцан гал зогсоох амлалтыг бататгасан явдал гэж мэдэгдсэн байна. Гэвч Украйны зүүн хэсэг дэх салан тусгаарлагчид ба хил дагуу үүсээд байгаа хурцадмал байдал нь "хоёр тусдаа асуудал" гэдгийг тэрээр онцолсон юм.

"Нормандын дөрвөл" гэж нэрлэгдэх болсон талууд Украйны арми болон салан тусгаарлагчдын хооронд үргэлжилж буй мөргөлдөөнийг зогсоох энхийн хэлэлцээр байгуулахаар 2014 оноос хойш ажиллаж байгаа билээ. Энэ удаагийн хэлэлцээр нь ОХУ болон Украйны зүгээс 2019 оноос хойш анх удаа Франц, Германтай хамтарсан мэдэгдэлд гарын үсэг зурахыг зөвшөөрсөн явдал болж байна.

Эх сурвалж: AFP

---