Нидерландад "Омикрон"-ы халдварын тархалт нэмэгдсээр байгаа хэдий ч тус улсын Засгийн газар өнөөдрөөс эхлэн цар тахлын хязгаарлалтуудыг хөнгөвчлөх болсноо мэдэгджээ.

Өмнөх хатуу хязгаарлалтын хүрээнд, кафе, баар, ресторан, музей зэргийг өнгөрсөн оны 12 дугаар сарын 18-наас хойш хаагаад байсан хэдий ч коронавирусийн тохиолдлын тоо нэмэгдсээр, өдөрт 60 мянга орчим бүртгэгдэх болсон байна. Олон нийтийн зүгээс сүүлийн нэг сарын хугацаанд хатуу арга хэмжээг эсэргүүцэх нь нэмэгдэж, нийслэл Амстердам хотод томоохон жагсаал цуглаан өрнөх болсон билээ.

Тэгвэл Ерөнхий сайд Марк Рютте эдгээр хязгаарлалтыг ирэх 3 дугаар сарын 8-н хүртэл хөнгөвчлөх болсноо мэдэгдсэн ч тодорхой эрсдэл авч байгаагаа мөн онцолжээ. Шинэ журмын дагуу, тус үйлчилгээний газар 22:00 цаг хүртэл ажиллах бөгөөд спорт, соёлын арга хэмжээнд 1,250 хүртэлх хүнийг оруулахыг зөвшөөрөх аж.

Түүнчлэн, Эрүүл мэндийн сайд Эрнст Куйперс коронавирусийг "ханиад биш" хэмээн анхааруулсан хэдий ч дүрэм журмыг зөөлрүүлэх нь чухал гэж мэдэгдсэн байна. Тэрээр "Хязгаарлагдмал байдалд урт удаан хугацаанд амьдрах нь бидний эрүүл мэнд, нийгэмд хор хөнөөлтэй" гэж хэлжээ.

Одоогийн байдлаар, Нидерландын нийт хүн амын бараг 90 орчим хувь нь вакцинд бүрэн хамрагдсан боловч ердөө 57 хувь нь нэмэлт тунгаа тариулсан бөгөөд энэ нь баруун Европын хөрш улс орнуудтай харьцуулахад бага үзүүлэлт юм. 

Эх сурвалж: BBC

---