ХБНГУ-ын баруун өмнөд хэсэгт орших Хайдельбергийн их сургуулийн лекцийн танхимд зэвсэгт этгээд халдаж, гал нээсний улмаас нэг хүн амиа алдан, гурван хүн шархаджээ.

Хоёр буугаар зэвсэглэсэн этгээд нь 18 настай сурагч байсан бөгөөд халдлага үйлдсэнийхээ дараа өөрийгөө буудаж, амиа хорлосон болохыг орон нутгийн цагдаа мэдэгдсэн юм.

Халдагч нь ямар ч шашин, улс төрийн зорилгогүй байсан гэж Германы хэвлэлүүд мэдээлж байна. Маннхайм хотод байрлах түүний байранд цагдаа нар нэгжлэг хийсэн бөгөөд тэрээр "WhatsApp" платформ дээр хүмүүсийг шийтгэх тухай зурвас илгээж байсныг нь олж тогтоожээ.

Одоо албаныхан Нойенхаймер Фельд хэсэг дэх их сургуулийн хотхонд томоохон ажиллагаа явуулж байгаа ба аврагчид болон онцгой байдлынханд чөлөөтэй хөдлөх боломж олгохын тулд иргэдийг тус бүсээс зайлсхийхийг хүссэн байна.

Тус улс нь галт зэвсгийн тухай хамгийн хатуу хуультай Европын орнуудын нэг бөгөөд сургуулийн зэвсэгт халдлага ховор тохиолддог. Мөн 25-аас доош насны иргэдэд галт зэвсгийн зөвшөөрөл олгохоосоо өмнө сэтгэл зүйн үнэлгээг зайлшгүй хийдэг аж.

Эх сурвалж: BBC

---