Мьянмарын удирдагч асан Аун Сан Су Чид тус улсын шүүхээс дахиад дөрвөн жилийн хорих ял оноожээ. Тэрээр өнгөрөгч 12 дугаар сард мөн дөрвөн жилийн хорих ял авсан хэдий ч үүнийг хоёр жил болгон хөнгөрүүлээд байсан юм.

Цэргийн хунтын төрийн эргэлтээр баривчлагдсан түүнийг коронавирусийн үеийн дүрэм журмыг зөрчиж, хууль бус радио станцуудыг эзэмшин, импортолсон гэх хэрэгт гэм буруутай гэж үзсэн байна. Нийслэл Нейпьидо хотод даваа гарагт болсон шүүх хурал хаалттай өрнөсөн бөгөөд хатагтай Су Чигийн өмгөөлөгчдийг хэвлэл мэдээлэл болон олон нийттэй харилцахыг хориглосон гэнэ.

НҮБ-ын Хүний ​​эрхийн асуудал хариуцсан тэргүүн Мишель Бачелет эдгээр шүүх хурлыг "хуурамч" гэж буруушаан, цэргийн хунтын эрх баригчид Аун Сан Су Чиг баривчлан, хорихын тулд шалтаг зохиож байгаа хэмээн мэдэгдсэн юм.

Нобелийн энх тайвны шагналт Аун Сан Су Чи өнгөрсөн оны 2 дугаар сараас хойш гэрийн хорионд орж, олны өмнө огт гараагүй байгаа билээ. 76 настай түүнийг авлига, сонгуулийн луйвар, албаны нууцыг задруулсан гэх мэт арав гаруй ноцтой хэрэгт буруутгаж байгаа хэдий ч тэрээр бүгдийг нь үгүйсгэж байгаа юм.

Одоо тэрээр нийт зургаан жилийн хорих ял сонсоод байгаа бөгөөд түүнд тулгаж буй бүх хэрэг нь шүүхээр нотлогдвол бүх насаараа хоригдож ч магадгүй. Хатагтай Су Чи нь Мьянмарын төрийн эргэлтээс хойш цэргийн хунтын гарт баривчлагдсан 10,600 хүний ​​нэг бөгөөд жагсаал цуглаанд оролцсон 1,303 орчим хүн амиа алдаад байгаа билээ.

Эх сурвалж: BBC

---