Мьянмарын удирдагч асан Аун Сан Су Чид тус улсын шүүхээс дөрвөн жилийн хорих ял оноожээ. Цэргийн хунтын төрийн эргэлтээр баривчлагдсан түүнийг хагалан бутаргах үзэл санааг өдөөн турхирч, коронавирусийн үеийн дүрэм журмыг зөрчсөн хэрэгт буруутай гэж үзсэн байна.

Шүүхийн зүгээс Аун Сан Су Чиг нийт 11 хэрэгт буруутгаж байгаа бөгөөд цаашид түүнд нэмэлт ял оноох төлөвтэй байгаа юм. Харин Аун Сан Су Чи эдгээр хэргийг бүгдийг нь няцаасан ба олон улсын ажиглагчид ч мөн энэ явдлыг шударга бус нөхцөл байдал гэж харж байна.

Энэ оны 2 дугаар сард болсон төрийн эргэлтээс хойш тэрээр гэрийн хорионд байгаа бөгөөд хэзээ шоронд орох нь тодорхойгүй байна.

Мьянмарын ардчиллын төлөөх зүтгэлтнүүд болон төрийн эргэлтийг эсэргүүцэгчдээс бүрдсэн Үндэсний эв нэгдлийн Засгийн газрын хэвлэлийн төлөөлөгч өмнө нь Аун Сан Су Чигийн биеийн байдал сайнгүй байгааг "ВВС" агентлагт ярьсан билээ. Тэрээр "Цэргийн генералууд түүнд 104 жилийн хорих ял өгөхөөр бэлтгэж байна. Тэд түүнийг шоронд үхэхийг хүсэж байгаа" хэмээн мэдэгдсэн юм.

Эх сурвалж: BBC

---