Монголын үндэсний музейн Аюулгүй байдал, үйлчилгээний албаны дарга бөгөөд Өмч хамгаалах байнгын зөвлөлийн нарийн бичгийн дарга Ц.Ундрахыг эрх мэдлээ урвуулан ашигласан хэрэгт холбогдуулан АТГ-ын Мөрдөн шалгах хэлтсийнхэн шалгаж дуусжээ.

Тэрбээр 2016 оны нэгдүгээр сараас хойш өнгөрсөн жилийн аравдугаар сар хүртэл дээрх албан тушаалыг хашсан нэгэн аж. Баттай эх сурвалжуудаас бидний авсан мэдээллээр Монголын үндэсний музейн албан тушаалтан Ц.Ундрах нь эрх мэдлээ ашиглан тус музейгээс зарласан “Wifi хөтөч хийлгэх” тендерт 2-3 аж ахуйн нэгжээс үнийн санал авсан ч хамаарал бүхий этгээд буюу авгынхаа эзэмшлийн “Вай Пи Эм” компанийг шалгаруулан 16 сая төгрөгийн үнэтэй худалдан авах гэрээ байгуулсан аж. Зөвхөн дээрх тендерээр тогтохгүй хэд хэдэн сонгон шалгаруулалтад дээрх аж ахуйн нэгжийг болон нөхрийнхөө байгуулсан “Цэгц мэргэн”, “Цагаан-Уул” ХХК-ийг удаа дараа тендерт шалгаруулан гэрээ хийж байсан нь мөрдөн шалгах ажиллагааны явцад тогтоогдсон гэнэ. Ингэхдээ хамгийн багадаа 2.6 сая, түүнээс дээш үнийн дүнтэй бараа, ажил, үйлчилгээ худалдан авах сонгон шалгаруултад нөлөөлж, хамаарал бүхий хүмүүсийнхээ компаниудад давуу байдал олгож байжээ.

Түүнд холбогдох хэргийг өдгөө Чингэлтэй дүүргийн Эрүүгийн хэргийн анхан шатны шүүхэд хянаж буй юм.

---