Казахстанд өрнөж буй эсэргүүцлийн хөдөлгөөн улам хурцдаж байгаа бөгөөд тус улсын аюулгүй байдлын албаныхан өнгөрсөн шөнө хэдэн арван иргэнийг хөнөөжээ. Эрх баригчид амиа алдсан иргэдийг "босогчид" гэж тодорхойлсон байна.

Түүнчлэн, мөргөлдөөний улмаас аюулгүй байдлын 13 алба хаагч амь үрэгдэж, 353 нь шархадсан бөгөөд 2,298 жагсагчийг баривчилсан гэж орон нутгийн хэвлэлээр мэдээлжээ. Харин тус улсын Эрүүл мэндийн яамнаас мэдээлснээр, нийтдээ мянга орчим хүн шархадсан аж.

Эмх замбараагүй байдал өнгөрөгч лхагва гарагт даамжирч, жагсагчид Алматы хотын захирагчийн ажлын байр болон Ерөнхийлөгчийн ордныг галдан шатаасан болохыг олон улсын мэдээллийн агентлагууд онцолж байна. Тэгвэл пүрэв гарагийн шөнө Алматы хотод их хэмжээний буун дуу сонсогдож байсныг "ВВС"-гийн төлөөлөгч мэдээлж, бичлэгийг нь хуваалцжээ.

Одоо Казахстаны Засгийн газар шатахууны үнийн дээд хязгаарыг дахин тогтоогоод байгаа бөгөөд энэхүү арга хэмжээ нь зургаан сарын турш үргэлжлэх юм. Гэвч тус улсын иргэдийн эсэргүүцэл хүчээ авсаар, үймээн самуун зогсож шинжгүй байна.

Эх сурвалж: BBC

---