20 жилийн турш албаныхнаас зугтаж чадсан Италийн мафийн толгойлогчийг "Google Maps"-ын тусламжтайгаар барьсан гэж тус улсын цагдаа нар мэдээлжээ.

61 настай Жоаккино Гаммино нь Испанийн Галапагар хотод Мануэль гэх нэр дор амьдарч байсан аж. Тэрээр 2002 онд Ромын шоронгоос оргосон бөгөөд дараа жил нь хүн амины хэргээр бүх насаараа хоригдох ял сонссон байна. Гаммино нь "Стидда" гэгддэг Сицилийн мафийн бүлэглэлийн гишүүн байсан бөгөөд Италийн цагдаа нарын эрэн сурвалжилж буй хамгийн аюултай гэмт хэрэгтнүүдийн нэг байжээ. 

Тэгвэл Гаммино Галапагар хотын нэгэн хүнсний дэлгүүрийн урд зогсож байгаа нь "Google" газрын зургийн дүрслэлд багтсан нь түүнийг барих гол түлхүүр болсон гэж мөрдөн байцаагчид тэмдэглэсэн юм. Ингээд цагдаа нар энэхүү хүнсний дэлгүүрийн ойролцоох нэгэн рестораны "Фейсбүүк" хуудсыг олж илрүүлэхэд тус мафийн толгойлогч тогоочийн хувцас өмссөн зургуудаа нийтэлсэн байсан бөгөөд түүнийг эрүүний сорвиор нь тодорхойлжээ.

Улмаар гэмт хэрэгтнийг өнгөрөгч 12 дугаар сарын 17-ны өдөр баривчилсан байна. Баривчилгааны үеэр Жоаккино Гаммино цагдаа нараас "Та нар намайг яаж олсон юм бэ? Би 10 жилийн турш гэр бүлтэйгээ ч утсаар яриагүй" гэж асуусан болохыг албаныхан мэдээлсэн юм.

Одоо Гаммино Испанид хоригдож байгаа бөгөөд Италийн цагдаа нар түүнийг ирэх 2 дугаар сарын эцэс гэхэд Италид буцааж авчрахаар төлөвлөж байгаа аж.

Эх сурвалж: BBC

---