БНСУ-д Монгол Улсаас ирсэн нэг иргэнээс коронавирусийн "Омикрон" хувилбарын халдвар илэрсэн гэж тус улсын "News1" агентлаг энэ сарын 3-ны өдөр мэдээлсэн билээ. Тэгвэл манай улсын Эрүүл мэндийн яамнаас энэхүү мэдээлэл худал болохыг мэдэгджээ.

Өмнөд Солонгосын хэвлэлийн нийтлэлд, Өмнөд Чунчон мужид "Омикрон" хувилбарын таван шинэ тохиолдол бүртгэгдсэн талаар мэдээлсэн юм. Халдвар авсан иргэдийн дунд Монгол болон АНУ-аас ирсэн гурван хүн байсан бөгөөд тэд өнгөрсөн оны 12 дугаар сарын 15, 25, 28-ны өдрүүдэд БНСУ-д ирсэн аж. Ингээд Монголоос ирсэн нэг хүн цар тахлын халдвартай болох нь 12 дугаар сарын 31-ний өдөр тогтоогдсон гэж уг нийтлэлд бичжээ.

Харин Эрүүл мэндийн яамнаас өнөөдөр хийсэн мэдэгдэлдээ "Олон улсын эрүүл мэндийн дүрмийн дагуу Монгол улсаас гадаад улсад зорчсон иргэдээс Ковид-19 эерэг илэрвэл ХӨСҮТ рүү мэдээлэгддэг ба 2021 оны 12 сарын 20 өдөр л хамгийн сүүлд гадаадад зорчсон Монгол иргэн эерэг гарсан мэдээлэл ирсэн, тэрхүү иргэнд ямар хувилбар илэрсэн талаарх гений дараалал тогтоох шинжилгээ хийгдэж байгааг мэдээлсэн байна. Монгол 2 иргэн гадаадад зорчиж, тэднээс Омикрон илэрсэн гэсэн мэдээлэл ташаа болохыг үүгээр хүргэж байна" хэмээн тэмдэглэсэн юм.

 Эх сурвалж: News1

---