БНАСАУ-ын 2022 оны үндэсний тэргүүлэх асуудал нь эдийн засаг ба хоол хүнс гэж тус улсын удирдагч Ким Жон Ун мэдэгджээ.

Эрх баригч намын гол хурлын төгсгөлд үг хэлэхдээ тэрээр хөгжлийг нэмэгдүүлж, ард түмний амьжиргааны түвшнийг дээшлүүлэх нь шинэ оны гол ажил гэж тэмдэглэсэн байна. Коронавирусийн цар тахлын улмаас хөл хорио тогтоож, хилээ хаагаад байгаа Умард Солонгост хүнсний хомстол нүүрлээд байгаа билээ.

Засгийн эрхэнд гараад 10 жил болж байгаа Ким Жон Ун 2021 онд "хүнд нөхцөл байдал" нүүрлэснийг хүлээн зөвшөөрч, "Ард түмний хоол хүнс, хувцас, орон сууцны асуудлыг шийдвэрлэхэд ахиц гаргах чухал зорилт тавьсан" гэж мэдэгджээ.

Гэвч үүний зэрэгцээ Солонгосын хойг дахь тогтворгүй байдлын улмаас Пхеньян батлан хамгаалах чадавхаа үргэлжлүүлэн бэхжүүлнэ гэж тэрээр мөн онцолсон юм.

Эх сурвалж: BBC

---